ការនាំចេញសរុបកើនឡើងជាង២០%
ភ្នំពេញប៉ុស្តិ៍ ២៦-០៨-២០១៣
ភ្នំពេញៈ ការនាំចេញសរុបរបស់កម្ពុជាបានកើនឡើង ជាង ២០ ភាគរយនៅឆមាសទី១ ឆ្នាំនេះបើធៀបនឹងរយៈពេលដូចគ្នាកាលពីឆ្នាំមុន។ អ្នកជំនាញ និងសេដ្ឋវិទូបាននិយាយថា ការងើបឡើងវិញនៃសេដ្ឋកិច្ចនៅតាមបណ្ដាប្រទេសនាំចេញជាមូលហេតុ ធ្វើឲ្យការនាំចេញរបស់កម្ពុជាស្ទុះឡើង។
តាមទិន្នន័យផ្លូវការបានមកពីក្រសួងពាណិជ្ជកម្មកាលពីសប្ដាហ៍ មុនបង្ហាញថា ការនាំចេញសរុបក្នុងរយៈពេលនេះមានតម្លៃជាង ៣ពាន់លាន ដុល្លារកើនឡើងជាង ២៦ ភាគរយបើធៀបនឹងរយៈពេលដូចគ្នាកាលពី ឆ្នាំមុន ខណៈការនាំចូលសរុបមានតម្លៃ ៤,៥ ពាន់លានដុល្លារ។
លោក Suzuki Hiroshi ប្រធានសេដ្ឋវិទូនៅវិទ្យាស្ថានស្រាវជ្រាវពាណិជ្ជកម្មកម្ពុជា បាននិយាយថា កម្ពុជានៅតែទទួលបានកំណើននៃការនាំចេញឆ្ពោះទៅបណ្ដាប្រទេស នាំចេញសំខាន់ៗរបស់ខ្លួន អាមេរិក និងសហភាពអឺរ៉ុប) ដោយសារការកែលម្អសេដ្ឋកិច្ចរបស់អាមេរិក និងសហភាពអឺរ៉ុបព្រមទាំងបណ្ដាប្រទេសផ្សេងៗទៀតនៅក្នុង តំបន់ដូចជាប្រទេសជប៉ុន។
លោកបន្តថា៖ «ដោយសារស្ថានភាពសេដ្ឋកិច្ចកាន់តែល្អប្រសើរនៅអាមេរិក សហភាពអឺរ៉ុប និងជប៉ុន ការនាំចេញរបស់កម្ពុជាហាក់ដូចជាទទួលបានកំណើនដ៏ល្អឥតឈប់ឈរនៅ ពេលនេះ។ សម្រាប់ការនាំចេញរបស់កម្ពុជា ដូចជាសម្លៀកបំពាក់ ស្បែកជើង ស្ថានភាពសេដ្ឋកិច្ចដ៏ល្អទាំងនេះស្ថិតក្នុងទិសដៅនាំចេញ ដ៏សំខាន់គឺទទួលបានការស្វាគមន៍យ៉ាងខ្លាំង»។
លោក Grant Knuckey អគ្គនាយកធនាគារ ANZ Royal បានថ្លែងថា៖ «តួរលេខនាំចេញគឺស្របគ្នាជាមួយនឹងការព្យាករ ហើយខ្ញុំគិតថា វាឆ្លុះបញ្ចាំងពីការកើនឡើងឥតឈប់ឈរខាងគុណភាព និងផលិតផលកែច្នៃកាន់តែខ្ពស់ ដែលទាក់ទងនឹងការនាំចេញរបស់កម្ពុជានៅក្នុងអតីតកាល»។
តាមទិន្នន័យនេះ ការនាំចេញសម្លៀកបំពាក់ និងវាយនភ័ណ្ឌសរុបបានកើនឡើងជិត ២០ភាគរយរហូតដល់ ២,៥ ពាន់ លានដុល្លារ ហើយការនាំចេញផលិតផលកសិកម្មមានតម្លៃ ២៩៣ លានដុល្លារកើនជិត ៤០ភាគរយ។
លោក Grant Knuckey បានបន្តថា ការកើនឡើងរបស់វិស័យកាត់ដេរគឺកំពុងឆ្លើយតបនឹងកំណើននៅក្នុង សេដ្ឋកិច្ចអាមេរិក ប៉ុន្តែលោកនិយាយថា ការនាំចេញផលិតផលកសិកម្មមានតិចតួច នៅក្នុងទីផ្សារនាំចេញនេះ។
លោកបន្តថា៖ «ដូចដែលខ្ញុំគិតទុកនិន្នាការកំណើនផលិតផលកសិកម្មនៅដដែល»។
លោក Suzuki Hiroshi បានថ្លែងថា ការធ្វើពិពិធកម្មផលិតផលថ្មីៗធ្វើឡើងដោយរដ្ឋាភិបាល កំពុងស្ថិតនៅក្នុងសញ្ញាដ៏ល្អមួយ។
លោកបន្តថា៖ «ការនាំចេញគ្រឿងបន្លាស់ដែលផលិតដោយរោងចក្រជប៉ុននៅ កម្ពុជាហាក់ដូចជាមានការកើនឡើង។ នេះគឺជាភ័ស្ដុតាងដ៏ជាក់ច្បាស់មួយដែលបញ្ជាក់ពីជោគជ័យនៃ គោលនយោបាយរដ្ឋាភិបាលក្នុងការអញ្ជើញការវិនិយោគផ្ទាល់ ពីបរទេសពិសេសឧស្សាហកម្មប្រើកម្លាំងពលកម្មច្រើនមកពីប្រទេសជប៉ុន។
ការធ្វើពិពិធកម្មការនាំចេញរបស់កម្ពុជាក្នុងចំណោមផលិតផល នាំចេញ (ពីវិស័យកាត់ដេររហូតដល់គ្រឿងបន្លាស់) និងទិសដៅនាំចេញ(អាមេរិក អឺរ៉ុប ជប៉ុន និងអាស៊ាន) ពេលនេះកំពុងទទួលបានជោគជ័យដោយពឹងលើកំណើន FDI»៕
No comments:
Post a Comment