ADB ផ្តល់កម្ចី៧០លានដុល្លារដល់វិស័យអង្ករនិងកំណែទម្រង់ហិរញ្ញវត្ថុកម្ពុជា
ភ្នំពេញប៉ុស្តិ៍ ២៦-០៨-២០១៣
ភ្នំពេញៈ ធនាគារអភិវឌ្ឍន៍ អាស៊ី (ADB) បានចុះហត្ថលេខាលើកិច្ចព្រមព្រៀងផ្ដល់កម្ចី ក្នុងទឹកប្រាក់ ៧០ លានដុល្លារដល់រាជរដ្ឋាភិបាលកម្ពុជា ដើម្បីពង្រីកវិស័យអង្ករ និងលើកកម្ពស់កំណែទម្រង់នានា នៅក្នុងវិស័យហិរញ្ញវត្ថុ។
កិច្ចព្រមព្រៀងដែលចុះហត្ថលេខានៅព្រឹកថ្ងៃចន្ទនេះ ដោយលោក គាត ឈន់ រដ្ឋមន្ដ្រីក្រសួង សេដ្ឋកិច្ច និងហិរញ្ញវត្ថុ និងលោក Eric Sidgwick នាយក ADB ប្រចាំប្រទេសកម្ពុជា គ្របដណ្ដប់លើកម្មវិធីអភិវឌ្ឍន៍ វិស័យពាណិជ្ផភាវូបនិយកម្មអង្ករដែលធន់ទៅនឹងអាកាសធាតុ (Rice-SDP) និងអនុកម្មវិធីទី២ របស់កម្មវិធីវិស័យហិរញ្ញវត្ថុទី៣ (FSP III)។
យោងតាមសេចក្តីប្រកាសព័ត៌មានរបស់ ADB កម្មវិធីអភិវឌ្ឍន៍វិស័យអង្ករនេះ នឹងគ្របដណ្ដប់លើខេត្ដបាត់ដំបង កំពង់ធំ និងព្រៃវែង ដែលស្ថិតក្នុងចំណោមតំបន់ផលិតអង្ករធំៗជាងគេ នៅក្នុងប្រទេសនេះ។
រីឯ អនុកម្មវិធីទី ២ ដែលមានទឹកប្រាក់ ១៥ លានដុល្លារ របស់ FSP III នឹងបន្ដកែលំអមូលដ្ឋានគតិយុត្ដិ សម្រាប់ស្ថាប័នហិរញ្ញវត្ថុនានា ដើម្បីធានាចីរភាពស្ថិរភាពហិរញ្ញវត្ថុ បង្កើនទំនុកចិត្ដលើទីផ្សារ ពង្រឹងក្របខ័ណ្ឌ ច្បាប់សម្រាប់អភិវឌ្ឍទីផ្សារមូលបត្រ និងឧស្សាហកម្មធានារ៉ាប់រង ធ្វើទំនើបកម្មការទូទាត់ និងប្រព័ន្ធផាត់ទាត់ ផ្ដល់ការគាំទ្រដល់ការបង្កើតយន្ដការដោះស្រាយវិវាទពាណិជ្ផកម្ម និងលើកកម្ពស់តម្លាភាព និងវិធានការបង្ក្រាបការលាងសំអាតប្រាក់ និងការផ្ដល់ហិរញ្ញប្បទានដល់អំពើភេវរកម្ម។
លោក Sidgwick បានមានប្រសាសន៍ថា «កម្មវិធីអភិវឌ្ឍន៍វិស័យអង្ករ គាំទ្រដល់គោលនយោបាយជម្រុញ ផលិតកម្មស្រូវ និងការនាំចេញអង្កររបស់រដ្ឋាភិបាល ដែលអំពាវនាវឱ្យមានការកែលំអពូជ បង្កើនប្រសិទ្ធភាពប្រព័ន្ធធារាសាស្ដ្រ ធ្វើឱ្យកាន់តែប្រសើរនូវទម្លាប់បង្កបង្កើនផល បង្កើនសមត្ថភាពសំងួត រក្សាទុក និងកិនស្រូវ និងលើកកម្ពស់ការស្វែងរកទីផ្សារ ដែលនឹងផ្លាស់ប្ដូរអនុវិស័យអង្កររបស់ប្រទេសកម្ពុជា ពីការបង្កបង្កើនផលសម្រាប់ ចិញ្ចឹមជីវិត ទៅជាចង្វាក់ផ្គត់ផ្គង់ឆ្ពោះទៅរកការធ្វើពាណិជ្ផកម្ម»។
សូមបញ្ជាក់ថា បន្ថែមពីលើកម្ចីរបស់ ADB ក្នុងទឹកប្រាក់ ៥៥ លានដុល្លារ កម្មវិធីអភិវឌ្ឍន៍វិស័យអង្ករបានកៀងគរហិរញ្ញប្បទានរួមគ្នាចំនួន ២៤,១ លានដុល្លារទៀត ដែលក្នុងនោះ រួមមាន ជំនួយឥតសំណងចំនួន ១៤,៦ លានដុល្លារ ពីមូលនិធិត្រាស់ហ្វាន់សម្រាប់កម្មវិធីកសិកម្ម និងសន្ដិសុខស្បៀងសកល និងជំនួយឥតសំណងចំនួន ៤,៥ លាន ដុល្លារ និងកម្ចីចំនួន ៥ លានដុល្លារ ពីមូលនិធិយុទ្ធសាស្ដ្រអាកាសធាតុ។
No comments:
Post a Comment