រដ្ឋមន្ត្រីថៃបដិសេធសេចក្តីរាយការណ៍របស់ BBC
ភ្នំពេញប៉ុស្តិ៍ ២៦-០៨-២០១៣
ក្រុងបាងកកៈ លោក Kittiratt NaRanong រដ្ឋមន្ត្រីហិរញ្ញវត្ថុថៃបានប្រកាសកាលពីថ្ងៃសៅរ៍ថា សេដ្ឋកិច្ចរបស់ថៃនៅតែរឹងមាំ និងមិនស្ថិតនៅក្នុងការដើរថយក្រោយនៃសេដ្ឋកិច្ចនោះទេ។
លោកបានថ្លែងថា សេដ្ឋកិច្ចថៃនៅតែមានលទ្ធភាពសម្រេចបានកំណើនខ្ពស់នៅឆមាសទីពីរ ក្នុងឆ្នាំនេះ ទោះបីការចំណាយរបស់រដ្ឋាភិបាលកើនឡើង។
លោក Kittiratt បានឆ្លើយតបទៅនឹងសេចក្តីរាយការណ៍របស់សារព័ត៌មាន BBC ដែលថា ប្រទេសថៃបានធ្លាក់ចូលក្នុងការដើរថយក្រោយនៃសេដ្ឋកិច្ច។ សារព័ត៌មាន BBC គ្រាន់តែបានលើកឡើងជាថ្មីអំពីការពិតដែលសារព័ត៌មានរបស់ថៃ បានរាយការណ៍ នាពេលថ្មីៗនេះ។
ថ្លែងនៅក្នុងកម្មវិធីមួយដែលមានចំណងជើងថា «រដ្ឋាភិបាលរបស់លោកស្រី យីងឡាក់ ជួបពិភាក្សាជាមួយពលរដ្ឋថៃ» នៅស្ថានីយទូរទស្សន៍ NBT លោក Kittiratt បន្តថា សារព័ត៌មាន BBC បានសន្និដ្ឋានបែបនេះដោយប្រៀបធៀបតួលេខកំណើនសេដ្ឋកិច្ចនៅឆមាសទី មួយ និងឆមាសទីពីរក្នុងឆ្នាំនេះ។
សេដ្ឋវិទូភាគច្រើនឲ្យនិយមន័យពាក្យ ការដើរថយក្រោយនៃសេដ្ឋកិច្ចថាជាការធ្លាក់ចុះនៃកំណើន ផ.ស.ស ក្នុងរយៈពេលពីរត្រីមាសជាប់គ្នា។ ក្នុងករណីនោះ ប្រទេសថៃមានស្ថានភាពត្រូវគ្នានឹងនិយមន័យនេះ។
កំណើន ផ.ស.ស នៅត្រីមាសទីពីរធ្លាក់ចុះ ០,៥ភាគរយ ធៀបនឹងត្រីមាសទីមួយដែលបានធ្លាក់ចុះ ១,៧ ភាគរយ ធៀបនឹងត្រីមាសទីបួនកាលពីឆ្នាំមុន។
ទោះជាយ៉ាងនេះក្តី សេដ្ឋកិច្ចប្រទេសថៃនៅតែកើនឡើងធៀបនឹងឆ្នាំមុន។ នេះបើយោងតាមទិន្នន័យផ្លូវការដែលក្រុមប្រឹក្សាជាតិអភិវឌ្ឍន៍ សេដ្ឋកិច្ច និងសង្គមកិច្ចរបស់ថៃ បានចេញផ្សាយកាលពីថ្ងៃចន្ទសប្តាហ៍មុន៕
No comments:
Post a Comment