ក្រសួងព័ត៌មាន អំពាវនាវឲ្យជៀសវាងការផ្សាយព័ត៌មានបំប៉ោងតាមហ្វេសប៊ុក
VOD 16-08-2013: ក្រសួង ព័ត៌មាន
អំពាវនាវឲ្យជៀសវាងការផ្សាយព័ត៌មាន ឬការអត្ថាធិប្បាយនិងចែករំលែកព័ត៌មាន
ដែលមិនមានប្រភពច្បាស់លាស់ នៅតាមប្រព័ន្ធផ្សព្វផ្សាយ ពិសេសតាមបណ្តាញទំនាក់ទំនងសង្គមហ្វេសប៊ុក។
សេចក្តីអំពាវនាវរបស់ក្រសួងព័ត៌មាន
កាលពីថ្ងៃទី១៥ ខែសីហានេះ បានយោងតាមព្រះរាជសាររបស់ព្រះមហាក្សត្រ ដែលអំពាវនាវឲ្យគណបក្សប្រជាជនកម្ពុជា
និងគណបក្សសង្គ្រោះជាតិ ដោះស្រាយបញ្ហាវិវាទដោយសន្តិវិធី។
ក្រសួងព័ត៌មាន បានលើកឡើងថា
ក្នុងស្មារតីនេះ ក្រសួងអំពាវនាវឲ្យជនរួមជាតិបន្តរក្សាភាពស្ងប់ស្ងៀម និងប្រកបមុខរបរតាមធម្មតា
ហើយអំពាវនាវឲ្យប្រព័ន្ធផ្សព្វផ្សាយនានា ពិសេសតាមបណ្តាញទំនាក់ទំនងសង្គមហ្វេសប៊ុក
សូមចុះផ្សាយព័ត៌មាន ការធ្វើអត្ថាធិប្បាយ
និងចែករំលែកដោយផ្អែកតាមព័ត៌មានពិត ប្រកបដោយវិជ្ជាជីវៈ។
ក្រសួងក៏បានហាមការធ្វើអត្ថាធិប្បាយ និងចែករំលែក
ដែលមិនមានប្រភពច្បាស់លាស់ បំប៉ោង បំភិតបំភ័យ ញុះញង់ ឲ្យមានអំពើហិង្សា
និងការភ័យខ្លាចក្នុងសង្គម។
នាយកមជ្ឈមណ្ឌលសិទ្ធិមនុស្សកម្ពុជា
លោក អ៊ូ វីរៈ យល់ថា ការអំពាវនាវរបស់ក្រសួងព័ត៌មាន
ជារិតត្បិតសេរីភាពទទួលបានព័ត៌មាន ៖ “វាប៉ះពាល់ ព្រោះអីក្រសួងនេះលំអៀង ក្រសួងព័ត៌មានរបស់គណបក្សប្រជាជន
ក្រសួងនេះលំអៀងជ្រុលពេក តាមពិតហ្វេសប៊ុកនេះក៏មានព័ត៌មានមិនពិត
ក៏ច្រើនដែរ ប៉ុន្តែក៏មានព័ត៌មានពិតដែរ
ហើយទុកឲ្យប្រជាពលរដ្ឋជាអ្នកវិនិច្ឆ័យ ប៉ុន្តែទូរទស្សន៍ទេជាប្រភពនៃបញ្ហា
ប្រសិនជាហ្វេសប៊ុកនេះគ្រាន់បើ គេមិនទៅមើលហ្វេសប៊ុកអស់ហ្នឹងទេ
គេមិនទៅតាមដានហ្វេសប៊ុកទេ ដោយសារទូរទស្សន៍ជាប្រភពរឿង
វិទ្យុសុទ្ធតែក្រសួង កំហុសទាំងនេះមិនមែន ដោយសារទូរទស្សន៍ទេ កំហុសទាំងអស់នេះដោយសារក្រសួងព័ត៌មាន
គាបសង្កត់ទូរទស្សន៍ទាំងអស់នេះ មិនឲ្យឯករាជ្យកើតទេ។
ក្រសួងព័ត៌មានប្រកាសផ្សាយនេះ មិនមានឆន្ទៈអ្វីក្រៅតែពីបិទ
សេរីភាពបញ្ចេញមតិណា ដែលផ្ទុយពីឆន្ទៈគណបក្សប្រជាជនទេ
ធ្វើអញ្ចឹងគឺមិនត្រូវទេ”។
វិធានការរបស់ក្រសួងព័ត៌មាន
ធ្វើឡើងនៅពេលដែលបណ្តាញ ទំនាក់ទំនងសង្គមហ្វេសប៊ុក កាលពីថ្ងៃទី១៥
ខែសីហានេះ គេបានឃើញ វីដេអូមួយដែលផលិត ដោយក្រុមមួយដែលហៅខ្លួនឯងថា
ជាយុវជនឈានមុខ ហើយខ្លឹមសារនៃវីដេអូនោះ ត្រូវបានអ្នក Comment ថាមានចរិកញុះញង់ឲ្យមានចលាចល
និងជាក្រុមទុច្ចរិក ចង់បង្កចលាចល ប្រសិនបើគណបក្សប្រឆាំងធ្វើបាតុកម្ម។
ករណីនេះលោក អ៊ូ វីរៈ យល់ថា
ជាបទល្មើសព្រហ្មទណ្ឌដែលក្រសួងព័ត៌មាន មិនគួរមើលរំលងឡើយ ៖ “ ចាប់ខ្លួនទៅ
អ្នកណាមានឆន្ទៈធ្វើរឿងព្រហ្មទណ្ឌខុសច្បាប់ ចាប់អ្នកនោះទៅ រឿងព្រហ្មទណ្ឌ
រឿងច្បាប់អ្នកណាធ្វើ អ្នកនោះទទួល មិនមែនគ្រាន់តែនិយាយអញ្ចឹងហើយ
រួចខ្លួនហើយ ទៅជាបិទបាតុកម្មទាំងមូលតែម្តងទេ អ្នកណាគេចង់ទៅលួចទ្រព្យសម្បត្តិ
ប្រជាពលរដ្ឋ ចាប់អ្នកនោះមុខទៅ”។
ក្នុងរយៈពេលចុងក្រោយនេះ
បណ្តាញទំនាក់ទំនងសង្គមហ្វេសប៊ុក មានលក្ខណៈយ៉ាងតិចពីរប្រភេទគឺទី១ ម្ចាស់
Profile បានបង្ហាញប្រវត្តពិតរបស់ខ្លួន
ដែលភាគច្រើនឃើញថា មិនសូវមានសកម្មភាពរិះគន់ខ្លាំងក្លា ឬផ្សព្វផ្សាយអ្វី ដែលមិនមានប្រភពច្បាស់លាស់ទេ។
ប៉ុន្តែប្រភេទទី២ អ្នកដាក់ Profile ខ្លួនឯងអាចពិតឬក្លែងក្លាយ
ហើយច្រើនផ្សព្វផ្សាយព័ត៌មានខ្វះការទទួលខុសត្រូវ ឬវាយប្រហារខ្លាំងៗ ទៅលើអ្វីមួយដែលខ្លួនមិនពេញចិត្ត៕
No comments:
Post a Comment