សម្តេចតេជោហ៊ុន
សែន ទទូចសុំកុំអោយខ្មែរនៅក្រៅប្រទេសអុចអាលបង្ករអស្ថេរភាពសង្គម
The Free Press Magazine ១៨-០៨-២០១៣៖ សម្តេចតេជោហ៊ុន សែន កាលពីថ្ងៃទី១៧ សីហា បានទទូចដល់ពលរដ្ឋខ្មែរមួយចំនួន ដែលរស់នៅក្រៅប្រទេស អោយបញ្ឈប់សកម្មភាពញុះញុងអុចអាលបញ្ឆេះកំហឹង បង្កចលាចលក្នុងប្រទេស ដោយគ្រាន់តែដើម្បីមនោគមន៍វិជ្ជានៃគណបក្សនយោបាយរបស់ខ្លួន ។
«សូមអស់លោកនៅក្រៅប្រទេស បញ្ឈប់នូវសកម្មភាពញុះញុង និងអុចអាលបង្ករ ចលាចលដល់ប្រជាពលរដ្ឋក្នុងប្រទេស ។ សូមកុំបំភ្លៃព័ត៍មានមិនពិត ដើម្បីផលប្រយោជន៍គណបក្សខ្លួនឯងដោយមិនឈឺឆ្អាលពីសុខទុក្ខប្រជា ពលរដ្ឋ ក្នុងប្រទេស ។ សូមកុំអុចអាលអោយខ្មែរបែកបាក់តទៅទៀតបើមិនបានជួយកសាង ប្រទេសទេនោះ» នេះជាសំណេរអំពាវនាវនៅក្នុងទំព័រហ្វេសប៊ុករបស់សម្តេចហ៊ុន សែន ។
សេចក្តីអំពាវនាវនេះត្រូវបានគេមើលឃើញថា ធ្វើឡើងនៅ២ថ្ងៃ មុនពេលដែលខ្មែរនិយមគណបក្សសង្រ្គោះជាតិនៅក្រៅប្រទេសគ្រោងនឹង ធ្វើបាតុកម្មទាមទារផ្លាស់ប្តូរមេដឹកនាំនៅប្រទេសកម្ពុជា នៅខាងមុខទីស្នាក់ការអង្គការសហប្រជាជាតិនៅទីក្រុងញូវយ៉ក សហរដ្ឋអាមេរិក នៅថ្ងៃទី១៩ ខែសីហា នេះ ។
នៅក្នុងឪកាសនោះដែរ សម្តេចតេជោ ក៏បានអំពាវនាវអោយប្រជាពលរដ្ឋខ្មែរនៅក្នុង ប្រទេសរក្សាសាមគ្គីភាព ភាពអត់ធ្មត់ និងរក្សាការយោគយល់គ្នាដើម្បីសុខសន្តិភាពសំរាប់ប្រជាជាតិខ្មែរ ទាំងមូល ។
«ស្ថានភាពប្រទេសជាតិគឺធម្មតាទេ សូមបងប្អូនប្រជាពលរដ្ឋប្រកបការងារទទួលទានជាធម្មតា ។ សូមថែរក្សាមិត្តភាព អត់ធ្មត់ និង យោគយល់ដល់គ្នា ទៅវិញទៅមកអោយបានល្អ ទោះជាមានការញុះញុង អុចអាល អូសទាញពីសំណាក់អ្នកនយោបាយណាក៏ដោយ»៕
No comments:
Post a Comment