មជ្ឈមណ្ឌល យ៉ាំង ខមមឺសល នឹងបើកដំណើរការ នៅពាក់កណ្តាលខែ កញ្ញា
ភ្នំពេញប៉ុស្តិ៍ ២២-០៨-២០១៣
ភ្នំពេញៈ មជ្ឈមណ្ឌលផ្សារទំនើប យ៉ាំង ខមមឺសល (Young Commercial Center and Resort) ដែលត្រូវបានវិនិយោគដោយវិនិយោគិនក្នុងស្រុកក្នុងទំហំទឹកប្រាក់ ជាង ១៥ លានដុល្លារស្ថិតនៅតាមបណ្តោយផ្លូវជាតិលេខ ៦ ក្បែរគល់ស្ពាន ជ្រោយចង្វារត្រើយខាងកើតនោះ គ្រោងនឹងបើកដំណើរការនៅពាក់កណ្តាលខែ កញ្ញា ខាងមុខឆាប់ៗនេះហើយ។
លោកស្រី Ashley Young អគ្គនាយិកាផ្សារទំនើប Young Commercial Center and Resort បាននិយាយថា ផ្សារទំនើបកម្ពស់ ៦ ជាន់នេះនឹងបើកបម្រើអតិថិជនចាប់ពីថ្ងៃទី១៨ ខែ កញ្ញា ឆ្នាំ ២០១៣ នេះតទៅ ដោយរហូតមកដល់ពេលនេះមានអតិថិជនមកជួលតូបបានជាង ៦៥ ភាគរយហើយ។
លោកស្រីបានបន្តថា ផ្សារទំនើប Young Commercial បានបែងចែកទីតាំងច្បាស់លាស់សម្រាប់កន្លែងលក់ទំនិញនីមួយៗដូចជា កន្លែងលក់គ្រឿងសម្អាង ហាងលក់សម្លៀកបំពាក់ ភោជនីយដ្ឋាន ហាងកាហ្វេ ផ្សារ ឡាក់គី កន្លែងលក់គ្រឿងអេឡិចត្រូនិក រោង ភាពយន្ត ខារ៉ាអូខេ និងកន្លែងកម្សាន្តជាច្រើនទៀត។
លោកស្រីថ្លែងថា៖ «ខ្ញុំជឿថា ផ្សារទំនើប Young Commercial នឹងទទួលបានជោគជ័យ ពីព្រោះសេវាកម្មរបស់ក្រុមហ៊ុនយើងមានបើកបម្រើសម្រាប់មនុស្សគ្រប់ វ័យ ដោយនៅទីនោះមានទាំងកន្លែងលក់ទំនិញ និងការកន្លែងកម្សាន្តផងដែរ»។
លោកស្រីប្រាប់ទៀតថា៖ «Young Commercial Center ស្ថិតនៅទីតាំងល្អ ព្រោះនៅតំបន់នេះមិនទាន់មានផ្សារទំនើបទេ ហើយតំបន់នេះក៏កំពុងមានការអភិវឌ្ឍលឿនទៅមុខផងដែរ ដោយត្រូវបានគេរំពឹងថា នឹងមានប្រជាប្រិយភាពខ្លាំងនៅពេលអនាគត»។
ការរចនានៅផ្នែកខាងក្រៅរបស់ Young Commercial Center and Resort ត្រូវបានគេសង្កេតឃើញថា បានទទួលការចាប់អារម្មណ៍យ៉ាងច្រើនពីអ្នកធ្វើដំណើរឆ្លងកាត់ទីនោះ ជាច្រើន។
ទាក់ទងទៅនឹងបញ្ហានេះ លោកស្រីអគ្គនាយិកា ខាងលើបានប្រាប់ថា៖ «នៅទីនេះយើងបានបង្កើតអ្វីៗឲ្យមានភាពប្លែកពីគេ ដោយយើងបានរៀបចំជាពិសេសធ្វើយ៉ាងណាដើម្បីទាក់ទាញអតិថិជនឲ្យមក ទិញទំនិញ និងកម្សាន្តនៅទីនេះដោយគ្មានការធុញទ្រាន់។ យើងមានគោលបំណងធ្វើឲ្យផ្សារនេះក្លាយជាទីកម្សាន្តសម្រាប់មនុស្ស គ្រប់វ័យ និងធ្វើឲ្យផ្សាររបស់យើងក្លាយជាផ្សារបម្រើឲ្យសេចក្តីត្រូវការ របស់ប្រជាជនគ្រប់ស្រទាប់វណ្ណៈ ហើយយើងក៏មិនបារម្ភពីការប្រកួតប្រជែងរបស់ផ្សារទំនើបដទៃទៀតនៅ ក្នុងរាជធានីភ្នំពេញនោះទេ»។
មជ្ឈមណ្ឌលផ្សារទំនើប Young Commercial Center and Resort មានផ្ទៃក្រឡាសរុប ៣៦០០០ ម៉ែត្រការ៉េ ដោយសាងសង់លើផ្ទៃដី ជាង ៣ ហិកតា និងមានចំណតធំទូលាយដែលអាច ចតរថយន្តបាន ៧០០ គ្រឿង និងម៉ូតូជាង ៥០០ គ្រឿង។ ផ្សារទំនើប Young Commercial គ្រោងនឹងបើកបម្រើអតិថិជនពីម៉ោង ៩ ព្រឹកដល់ម៉ោង ៩ យប់ និងបន្តរហូតដល់យប់សម្រាប់សេវាកម្មកម្សាន្តសប្បាយផ្សេងៗទៀត។
នៅពេលនេះផ្សារទំនើប Young Commercial Center and Resort ក៏បាននិងកំពុងអភិវឌ្ឍន៍កន្លែងកម្សាន្ត Water Park ដែលគ្រោងនឹងដាក់ឲ្យដំណើរការនៅឆ្នាំ ២០១៤ខាងមុខនេះផងដែរ។
កញ្ញា ហាំង សុពិសី ប្រធានគ្រប់គ្រងទូទៅផ្សារទំនើប រតនា ផ្លាហ្សា បាននិយាយថា ប្រសិនបើមើលពីចរន្តនៃការអភិវឌ្ឍផ្សារទំនើបក្នុងរាជធានីភ្នំពេញ នាពេលបច្ចុប្បន្ននេះ គឺការផ្គត់ផ្គង់មានច្រើនលើសតម្រូវការដូច្នេះបើមានការប្រកួត ប្រជែងថ្មីៗបន្ថែមទៀតនោះទោះតិច ឬច្រើនវានឹងមានផលប៉ះពាល់។ ទោះបីជាយ៉ាងណាការបើករបស់ Young Commercial Center and Resort នាពេលខាងមុខនឹងមិនសូវមានផលប៉ះពាល់ដល់ផ្សារទំនើប រតនា ផ្លាហ្សា ទេ ព្រោះផ្សារទាំង ២ មានចម្ងាយឆ្ងាយពីគ្នា។
កញ្ញាបានអះអាងថា៖ «ពីមុនអតិថិជនបានមកផ្សាររបស់យើងបើទោះបីជាផ្ទះពួកគេនៅឆ្ងាយ បន្តិចក៏ដោយ ប៉ុន្តែប្រសិនបើមានផ្សារថ្មីៗបើកនៅជិតផ្ទះគាត់ពួកគាត់នឹងអាច កាត់បន្ថយមកផ្សាររបស់យើងហេតុនេះការបើកផ្សារ Young Commercial នឹងមានផលប៉ះពាល់តិចតួចដល់យើង»។ កញ្ញាបានបន្ថែមថា៖ «បច្ចុប្បន្ននេះនិន្នាការទិញទំនិញនៅតាមផ្សារទំនើបកំពុងមានការ កើនឡើងនៅកម្ពុជា ព្រោះផ្សារទំនើបមានផាសុកភាពជាងផ្សារធម្មតា តែការកើនឡើងនេះមិនគំហុកទេ»។
លោក គុយ វ៉ាត អគ្គនាយកក្រុមហ៊ុន VTrust Group បានមានប្រសាសន៍ថា ទីតាំងរបស់ Young Commercial Center and Resort មានភាពសមស្រប ដោយសារមានការអភិវឌ្ឍនៅតំបន់នោះកាន់តែច្រើន ប៉ុន្តែភាពជោគជ័យ ឬមិនជោគជ័យវាអាស្រ័យទៅលើជំនឿចិត្តរបស់ប្រជាពលរដ្ឋ និងការគ្រប់គ្រងផងដែរ៕
No comments:
Post a Comment