ធនាគារម៉ាឡេស៊ីថ្មីមួយទៀតបើកដំណើរការនៅកម្ពុជា
ភ្នំពេញប៉ុស្តិ៍ ២៣-០៨-២០១៣
ភ្នំពេញៈ ធនាគារ Hong Leong Bank (Cambodia) Plc (“HLBCAM”) ដែលជាធនាគារបុត្រសម្ព័ន្ធគ្រប់គ្រងដោយធនាគារ Leong Bank Berhad របស់ម៉ាឡេស៊ីបានបើកដំណើរការជាផ្លូវការនៅកម្ពុជានៅថ្ងៃនេះ។
នេះជាធនាគារទី៤ហើយរបស់ប្រទេសម៉ាឡេស៊ីដែលចូលមកក្នុងឧស្សាហកម្មធនាគារដ៏ចង្អៀតរបស់កម្ពុជា។
ធនាគារ HLBCAM បានទទួលបានការយល់ព្រមជាគោលការណ៍ក្នុងការបង្កើតនិងដំណើរការនៅ កម្ពុជា ៦ ខែកន្លងមកហើយក្នុងការចាប់យកអតិថិជនថ្មី និងសក្ដានុពលនៅទីនេះ។
លោកស្រី Tan Kong Khoon នាយកគ្រប់គ្រងធនាគារ Hong Leong Bank Berhad បានឲ្យដឹងនៅក្នុងសេចក្ដីប្រកាសព័ត៌មានថា កំណើនសេដ្ឋកិច្ចដ៏រហ័សនិងស្ថិរភាពនយោបាយរបស់កម្ពុជាគឺជាចំណុចដ៏ សំខាន់ក្នុងការជំរុញការពង្រីកធនាគារនៅទីនេះ។
លោកស្រីបន្តថា៖ «យើងមានសេចក្ដីរំភើបយ៉ាងខ្លាំងអំពីការបង្កើតវត្តមានរបស់យើងនៅ កម្ពុជា។ ដោយមានការដឹកនាំដ៏រឹងមាំរបស់ប្រទេស និងកំណើនសេដ្ឋកិច្ចនិងប្រជាជនយ៉ាងឆាប់រហ័ស កម្ពុជាគឺជាទីផ្សារក្នុងតំបន់ដ៏សំខាន់របស់យើងហើយវត្តមានរបស់ យើងនៅទីនេះគឺជាផ្នែកនៃយុទ្ធសាស្រ្តរបស់យើងក្នុងការពង្រីក ប្រតិបត្តិការរបស់តំបន់នេះ។ ការបើកដំណើរការរបស់ HLBCAM កើតចេញពីការប្ដេជ្ញាចិត្តរបស់យើងក្នុងការបង្កើតនិងរួមចំណែក ដល់វិស័យធនាគារនៅកម្ពុជានឹងធ្វើឲ្យសេដ្ឋកិច្ច កាន់តែរីកលូតលាស់»។
លោក Joe Farrugia អគ្គនាយកធនាគារ Hong Leong Bank (Cambodia) Plc បាននិយាយថា៖ «ជាមួយនឹងទស្សនវិជ្ជារបស់យើងនៃការបង្កើតតម្លៃនិងការប្ដេជ្ញា ចិត្តក្នុងការពង្រីកក្នុងស្រុក យើងអាចផ្ដល់ដល់សហគមន៍កម្ពុជានូវភាពងាយស្រួលក្នុងការប្រើសេវា ធនាគារដែលរីកចម្រើនជាលំដាប់និងប្រកបដោយសមត្ថភាព»។
លោកស្រី ងួន សុខា អគ្គនាយកធនាគារជាតិនៃកម្ពុជា បានប្រាប់ភ្នំពេញ ប៉ុស្ដិ៍ពីមុនថា ភាពងាយស្រួលក្នុងការវិនិយោគនិងពាណិជ្ជកម្មដែលកំពុងកើនឡើងរបស់ ម៉ាឡេស៊ីមកកម្ពុជា ជាមូលហេតុសំខាន់សម្រាប់កំណើនធនាគារម៉ាឡេស៊ីមកកម្ពុជា។
លោកស្រីបន្តថា៖ «ទំនាក់ទំនងពាណិជ្ជកម្មនិងការវិនិយោគជាមួយម៉ាឡេស៊ីកំពុងកើនឡើង យ៉ាងខ្លាំងដូច្នេះវត្តមានរបស់ធនាគារម៉ាឡេស៊ីថ្មីនេះនឹងបំពេញ កំណើនជាតម្រូវការពីវិនិយោគិនម៉ាឡេស៊ី ឬពាណិជ្ជករនៅទីនេះ។ ខ្ញុំគិតថា ទោះបីជាយើងមានធនាគារចំនួន៣រួចហើយមកពីម៉ាឡេស៊ីក៏ដោយ ក៏វត្តមានរបស់ធនាគារ Hong Leong Bank នៅក្នុងទីផ្សារនេះគឺនៅតែល្អដោយសារតែយើងមានឱកាសច្រើន សម្រាប់ពួកគេក្នុងការពង្រីក»។
តួលេខពាណិជ្ជកម្មពីស្ថានទូតម៉ាឡេស៊ីនៅភ្នំពេញឲ្យដឹងថា ទំហំពាណិជ្ជកម្មរវាងម៉ាឡេស៊ីនិងកម្ពុជាមានតម្លៃ៣៧៦,១លានដុល្លារ កាលពីឆ្នាំ២០១២ដែលបង្ហាញពីការកើនឡើង ១៧,៣ ភាគរយធៀបរយៈពេលដូចគ្នាពីឆ្នាំ ២០១២ មានតែ ៣២០,៥ លានដុល្លារប៉ុណ្ណោះ៕
No comments:
Post a Comment