ការលក់ផ្ទះនៅ
សិង្ហបុរី បានធ្លាក់ចុះទាបបំផុតក្នុងខែ កក្កដា
ភ្នំពេញប៉ុស្តិ៍ ២២-០៨-២០១៣
សិង្ហបុរីៈ ការលក់ផ្ទះនៅប្រទេស សិង្ហបុរីនៅក្នុងខែ កក្កដា បានធ្លាក់ចុះខ្លាំងបំផុតគិតចាប់តាំងពីខែ ធ្នូ ឆ្នាំ ២០០៩ ដោយសារក្រុមវិនិយោគមានការស្ទាក់ស្ទើរចំពោះវិធានការកាត់បន្ថយ ឥណទានអចលនទ្រព្យថ្មី ខណៈក្រុមហ៊ុនអភិវឌ្ឍន៍បង្កើតគម្រោងតិចតួច។
ការលក់ផ្ទះបានធ្លាក់ចុះមកត្រឹម ៤៨១ Unit កាលពីខែមុន ពោលគឺមានកម្រិតទាបជាងការលក់កាលពីខែ មិថុនា ៧៣ ភាគរយ នេះបើយោងតាមទិន្នន័យទទួលបានពីអាជ្ញាធរអភិវឌ្ឍន៍ទីក្រុង ដែលបានចេញផ្សាយកាលពីចុងសប្តាហ៍មុន។ ការលក់ផ្ទះនៅ សិង្ហបុរី បានកើនឡើងដល់កម្រិតខ្ពស់បំផុតរហូតដល់ ២៧៩៣ Unit កាលពីខែ មីនា កន្លងមក។
តម្លៃផ្ទះបានកើនឡើងដល់កម្រិតខ្ពស់បំផុត នៅពេលអត្រាការប្រាក់ទាប ដែលបានធ្វើឲ្យមានក្តីបារម្ភអំពីកំណើនតម្លៃអចលនទ្រព្យ និងបានជំរុញឲ្យរដ្ឋាភិបាល សិង្ហបុរី បង្កើនយុទ្ធនាការរយៈពេល ៤ ឆ្នាំកាលពីខែ មករា ដើម្បីទប់ស្កាត់ការរកស៊ីកេងចំណេញនៅក្នុងទីផ្សារអចលនទ្រព្យដែល មានតម្លៃខ្ពស់ជាងគេទីពីរនៅតំបន់អាស៊ីមួយ។ កាលពីខែ មិថុនា ប្រទេស សិង្ហបុរី ក៏បានប្រកាសពីច្បាប់ថ្មីក្នុងការគ្រប់គ្រងគ្រឹះស្ថាន ហិរញ្ញវត្ថុនានាទាក់ទងនឹងការផ្តល់ឥណទានដល់វិស័យអចលនទ្រព្យផង ដែរ។
លោក Nicholas Mak នាយកប្រតិបត្តិក្រុមហ៊ុន SLP International Property Consultants ប្រចាំនៅប្រទេស សិង្ហបុរី មានប្រសាសន៍ថា៖ «ការលក់ផ្ទះធ្លាក់ចុះនៅពេលនេះ គឺដោយសារការភ័យខ្លាចចំពោះច្បាប់ឥណទានថ្មី គួបផ្សំនឹងដំណើរការផ្តល់ឥណទានយឺតយ៉ាវរបស់ធនាគារ និងការអនុវត្តច្បាប់ថ្មី ដែលបានធ្វើឲ្យក្រុមហ៊ុនអភិវឌ្ឍន៍នានាប្រកាសតិចតួចអំពីគម្រោង អភិវឌ្ឍន៍របស់ខ្លួន»។
អាជ្ញាធររូបិយវត្ថុប្រទេស សិង្ហបុរី ធ្លាប់បានប្រកាសថា ក្របខ័ណ្ឌការងារថ្មីទាមទារឲ្យធនាគារទាំងអស់ពិចារណាចំពោះបំណុល របស់អ្នកខ្ចីប្រាក់នៅពេលផ្តល់ឥណទានអចលនទ្រព្យ។
សន្ទស្សន៍នៃតម្លៃលំនៅឋានឯកជននៅប្រទេសដីកោះនេះបានកើនឡើង ចំនួន ១ ភាគរយ នៅត្រីមាសទីពីរ ពោលគឺកើនឡើងបើធៀបនឹងសន្ទស្សន៍ ០,៦ ភាគរយនៅត្រីមាសទីមួយ។ តម្លៃផ្ទះនៅជាយក្រុង បានកើនឡើង ៣,៨ ភាគរយនៅត្រីមាសទីពីរ បើធៀបនឹងកំណើន ១,៤ ភាគរយនៅត្រីមាសទីមួយ នេះបើយោងតាមទិន្នន័យរបស់រដ្ឋាភិបាល សិង្ហបុរី។
លោក Tharman Shanmugaratnam រដ្ឋមន្ត្រីហិរញ្ញវត្ថុ សិង្ហបុរី បានប្រាប់កាលពីខែ កុម្ភៈ ថា ប្រទេស សិង្ហបុរី ក៏មានផែនការដំឡើងពន្ធចំពោះម្ចាស់ផ្ទះប្រណីតនិងលំនៅឋានសម្រាប់ ជួលផងដែរ។
ប្រទេស សិង្ហបុរី បានព្យាយាមទម្លាក់តម្លៃអចលនទ្រព្យតាំងពីឆ្នាំ ២០០៩ មក នៅពេលដែលរដ្ឋាភិបាលហាមឃាត់ឥណទានដែលយកតែការប្រាក់សម្រាប់គម្រោង អចលនទ្រព្យមួយចំនួន និងឈប់អនុញ្ញាតឲ្យក្រុមហ៊ុនអភិវឌ្ឍន៍យកការប្រាក់ចំពោះអគារផ្ទះ ល្វែង ដែលកំពុងសាងសង់។
ក្រសួងអភិវឌ្ឍន៍ជាតិរបស់ប្រទេស សិង្ហបុរី បានប្រកាសឲ្យដឹងនៅក្នុងសេចក្តីថ្លែងការណ៍មួយនៅលើគេហទំព័ររបស់ ខ្លួនមួយកាលពីថ្ងៃ ទី១៣ ខែ សីហា ដែលជាការឆ្លើយតបទៅនឹងសំណួររបស់សមាជិកសភាថា តម្លៃផ្ទះបានធ្លាក់ចុះគួរឲ្យកត់សម្គាល់បន្ទាប់ពីវិធានការទប់ ស្កាត់ជាច្រើនលើករបស់រដ្ឋាភិបាលប្រទេស សិង្ហបុរី៕
No comments:
Post a Comment