Apple ចេញ​លក់ iPad ស្តើង​ជាង​មុន

ភ្នំពេញប៉ុស្តិ៍ ១៤-០៨-២០១៣៖ យោង​តាម​ប្រភព​មួយ​បាន​ឲ្យ​ដឹង​ថា ក្រុមហ៊ុន Apple Inc កំពុង​ត្រៀម​ខ្លួន​ដាក់​បង្ហាញ​កុំព្យូទ័រ iPad ស៊េរី​ថ្មី​ដែល​មាន​រាង​កាន់​តែ​ស្តើង ខណៈ​ក្រុមហ៊ុន​នេះ​ព្យាយាម​រក្សា​តំណែង​កំពូល​នៅ​ក្នុង​ទីផ្សារ​កុំព្យូទ័រ ថេបភ្លីត ដែល​មាន​ស្ថានភាព​កាន់​តែ​ចង្អៀត​នេះ។

ប្រភព​ដដែល​ដែល​បាន​ស្នើ​មិន​បង្ហាញ​អត្តសញ្ញាណ​ដោយ​សារ​ការ​អភិវឌ្ឍ​នេះ ​គឺជា​រឿង​ឯកជន បាន​បន្ត​ឲ្យ​ដឹង​ថា ក្រុមហ៊ុន Apple ក៏​គ្រោង​នឹង​ដាក់​បង្ហាញ​កុំព្យូទ័រ iPad ខ្នាត​តូច​ស៊េរី​ថ្មី​ផង​ដែរ ពោល​គឺជា​កុំព្យូទ័រ iPad ខ្នាត​តូច​ដែល​មាន​អេក្រង់​ច្បាស់​ល្អ។ កុំព្យូទ័រ iPad ម៉ូដែល​ថ្មីៗ​ទាំង​នេះ​នឹង​ត្រូវ​ដាក់​បង្ហាញ​នៅ​ត្រីមាស​ទីបួន​ក្នុង​ឆ្នាំ ​នេះ។

បន្ទាប់​ពី​ការ​ធ្វើ​ឲ្យ​កាន់​តែ​មាន​ប្រជាប្រិយភាព​នូវ​កុំព្យូទ័រ ថេបភ្លីត ដែល​បាន​ច្របាច់​បញ្ចូល​មុខ​ងារ​អេក្រង់​ថាច់​ស្គ្រីន​របស់​ទូរស័ព្ទ​ដៃ​ ទំនើប និង​កុំព្យូទ័រ​យួរ​ដៃ ក្រុមហ៊ុន Apple កំពុង​ប្រឈម​នឹង​ការ​ប្រកួត​ប្រជែង​កាន់​តែ​ខ្លាំង​ពី​សំណាក់​ក្រុមហ៊ុន Google Inc ក្រុមហ៊ុន Samsung Electronics និង​ក្រុមហ៊ុន Asustek Computer Inc។

ចំណែក​ទីផ្សារ​របស់​ក្រុមហ៊ុន Apple បាន​ធ្លាក់​ចុះ​មក​នៅ​ត្រឹម ៣២,៤ ភាគរយ​នៅ​ត្រីមាស​ទីពីរ​ធៀប​នឹង​ចំណែក ទីផ្សារ ៦០,៣ ភាគរយ​ក្នុង​រយៈ​ពេល​ដូច​គ្នា​កាល​ពី​ឆ្នាំ​មុន។ នេះ​បើ​យោង​តាម​ក្រុមហ៊ុន​ស្រាវជ្រាវ​ទីផ្សារ IDC។

ក្រុមហ៊ុន IDC បាន​ឲ្យ​ដឹង​កាល​ពី​សប្តាហ៍​មុន​នេះ​ថា ការ​នាំ​ចេញ​កុំព្យូទ័រ​ថេបភ្លីត​កំពុង​តែ​ធ្លាក់​ចុះ ដោយ​អតិថិជន​កំពុង​ទន្ទឹង​រង់ចាំ​កុំព្យូទ័រ​ម៉ូដែល​ថ្មី​របស់​ក្រុមហ៊ុន Apple។

ប្រភព​ដដែល​បាន​បន្ត​ឲ្យ​ដឹង​ទៀត​ថា កុំព្យូទ័រ iPad ស៊េរី​ថ្មី​ដែល​មាន​អេក្រង់​ទំហំ ៩,៧ អ៊ិញ នឹង​មាន​រូប​រាង​ស្រដៀង​គ្នា​ទៅ​នឹង​កុំព្យូទ័រ iPad ខ្នាត​តូច​នាពេល​បច្ចុប្បន្ន​តែ​មាន​ស៊ុម​តូច​ជាង​កុំព្យូទ័រ iPad ស៊េរី​ចាស់​។ នេះ​គឺជា​ការ​រចនា​ម៉ូដ​ឡើង​វិញ​លើក​ដំបូង គិត​តាំង​ពី​ខែ​មីនា ឆ្នាំ ២០១២​មក នៅ​ពេល​ក្រុមហ៊ុន Apple បាន​ដាក់​បង្ហាញ​កុំព្យូទ័រ iPad ដែល​មាន​អេក្រង់​ច្បាស់​ល្អ និង​មាន​រាង​ដូច​កុំព្យូទ័រ​ម៉ូដែល​ផ្សេងៗ ដែល​ដាក់​លក់​នា​ពេល​បច្ចុប្បន្ន។

កុំព្យូទ័រ iPad ខ្នាត​តូច​ដែល មាន​អេក្រង់​ទំហំ ៧,៩ អ៊ិញ ពុំ​មាន​អេក្រង់​ច្បាស់​ល្អ​ដូច​ទូរស័ព្ទ iPhone និង​កុំព្យូទ័រ iPad ខ្នាត​ធំ​ដែល​កំពុង​ដាក់​លក់​នា​ពេល​បច្ចុប្បន្ន​នេះ​ទេ។

លោក Trudy Muller អ្នក​នាំ​ពាក្យ​របស់​ក្រុមហ៊ុន​ដែល​មាន​មូលដ្ឋាន​នៅ​ទីក្រុង Cupertino ក្នុង​រដ្ឋ California មួយ​នេះ​បាន​បដិសេធ​អធិប្បាយ​ពី​បញ្ហា​នេះ។

សារ​ព័ត៌មាន Wall Street Journal បាន​រាយការណ៍​នា​ពេល​កន្លង​មក​ថា កុំព្យូទ័រ iPad ត្រូវ​បាន​គេ​រចនា​ម៉ូដ​កាន់​ទំនើប​ដោយ​នៅ​ពេល​នេះ​វា​មាន​រាង​ស្តើង​ជាង​ មុន៕ BP