កូរ៉េខាងជើង បញ្ចេញទូរស័ព្ទស្មាតហ្វូន
ភ្នំពេញប៉ុស្តិ៍ ១៤-០៨-២០១៣៖ កូរ៉េខាងជើង ដែលជាប្រទេសឯកោ និងត្រូវបានគេតាមដានខ្លាំងជាងគេមួយរបស់ពិភពលោកបានបញ្ចេញ ទូរស័ព្ទ ស្មាតហ្វូន ផលិតក្នុងស្រុកលើកដំបូងរបស់ខ្លួន។
ទោះជាយ៉ាងនេះក្តី អ្នកវិភាគផ្នែកឧស្សាហកម្មនេះបានឲ្យដឹងថា ទូរស័ព្ទទំនើបម៉ូដែល«Arirang» ដែលផលិតឡើងដោយប្រើប្រាស់កម្មវិធី Android OS របស់ក្រុមហ៊ុន Google នេះ ទំនងជាត្រូវបានផលិតឡើងនៅប្រទេស ចិនដែលជាប្រទេសជិតខាងរបស់ខ្លួន។
វត្តមានទូរស័ព្ទទំនើប ដែលដាក់ឈ្មោះតាមបទចម្រៀងបុរាណដ៏ល្បីល្បាញរបស់កូរ៉េមួយនេះបាន លេចមុខឡើងនៅអំឡុងពេលលោក គីម ជុងអ៊ុន មេដឹកនាំកូរ៉េខាងជើងចុះត្រួតពិនិត្យរោងចក្រមួយកាលពីចុង សប្តាហ៍មុននេះ។ ទីភ្នាក់ងារព័ត៌មានមជ្ឈិមកូរ៉េរបស់រដ្ឋាភិបាល ព្យុងយ៉ាង (KCNA) បានរាយការណ៍ថា៖ «ក្នុងដំណើរទស្សនកិច្ចនេះលោក គីម ត្រូវបានគេផ្តល់ព័ត៌មានលម្អិតស្តីពីសមត្ថភាព គុណភាព និងការវេចខ្ចប់ទូរស័ព្ទដៃម៉ូដែល Arirang នេះ»។
អ្នកវិភាគមួយចំនួន បានលើកឡើងថា ទូរស័ព្ទម៉ូដែល Arirang នេះ ផលិតឡើងក្នុងគោលបំណងផ្តល់ជូនពលរដ្ឋកូរ៉េខាងជើងប្រើប្រាស់ជា ផ្លូវការ ដែលគេអាចពិនិត្យតាមដានបានយ៉ាងសុក្រឹតតាមរយៈការប្រើប្រាស់ ទូរស័ព្ទទំនើបនេះ។ ខណៈការប្រើប្រាស់អ៊ីនធឺណិត ដែលស្ទើរតែគ្មានទាល់តែសោះនៅប្រទេសកូរ៉េខាងជើង និងដែលក្លាយជាចំណុចសំខាន់នៃការអង្កេតសេរីភាពសារព័ត៌មាននោះ ប្រទេសមួយនេះ មិនមែនជាតំបន់បច្ចេកវិទ្យាព័ត៌មានមួយដ៏ពេញលេញទេ។
ទូរស័ព្ទដៃត្រូវបានដាក់ឲ្យប្រើប្រាស់កាលពីឆ្នាំ ២០០៨ តាមរយៈក្រុមហ៊ុនបណ្តាក់ទុនរួមគ្នាមួយជាមួយនឹងក្រុមហ៊ុន ទូរគមនាគមន៍ អេហ្ស៊ីប គឺក្រុមហ៊ុន Orascom ដែលបច្ចុប្បន្នក្រុមហ៊ុននេះ បានអះអាងថា មានអ្នកប្រើប្រាស់ទូរស័ព្ទចល័តចំនួន ២ លាននាក់ហើយនៅក្នុង ប្រទេសកូរ៉េខាងជើង។
ប្រព័ន្ធអ៊ីនធឺណិតក្នុងស្រុកត្រូវបាន បើកឲ្យប្រើនៅឆ្នាំ ២០០២ ដោយអង្គភាពរដ្ឋមួយចំនួន មានគេហទំព័រផ្ទាល់ខ្លួន។
វាជាដំណើរវិវឌ្ឍជាទូទៅមួយចំពោះប្រទេសក្រីក្រ ដែលត្រូវការវិនិយោគយ៉ាងខ្លាំង ប៉ុន្តែនៅប្រទេសកូរ៉េខាងជើង ភាពចាំបាច់ចំពោះវិស័យសេដ្ឋកិច្ច តែងតែត្រូវបានថ្លែងទៅនឹងវិបត្តិសង្គមដែលអាចកើតមាន។
អ្នកប្រើប្រាស់ប្រព័ន្ធទូរស័ព្ទដៃរបស់ក្រុមហ៊ុនបណ្តាញទូរស័ព្ទ ចល័តតែមួយគត់គឺក្រុមហ៊ុន Koryolink អាចហៅទូរស័ព្ទរកគ្នាបាន តែមិនអាចហៅចេញទៅក្រៅប្រទេសបានទេ។
ប្រព័ន្ធអ៊ីនធឺណិត វិញហាក់ដូចជា ត្រូវបានកាត់ផ្តាច់ចេញពីពិភពលោកដោយអនុញ្ញាតឲ្យមានអ្នកប្រើ ប្រាស់តិចតួច ដើម្បីផ្លាស់ប្តូរព័ត៌មានដែលអនុញ្ញាតដោយរដ្ឋ និងព័ត៌មានតិចតួចផ្សេងទៀតតែប៉ុណ្ណោះ៕ BP
No comments:
Post a Comment