Facebook ទិញក្រុមហ៊ុនផលិតកម្មវិធីបកប្រែភាសា
ភ្នំពេញប៉ុស្តិ៍ ១៤-០៨-២០១៣៖ ក្រុមហ៊ុន Facebook បានព្រមព្រៀងទិញយកក្រុមហ៊ុន Mobile Technologies ដែលជាក្រុមហ៊ុនមានជំនាញខាងផលិតកម្មវិធីបកប្រែភាសាជាសំឡេង នេះបើតាមការប្រកាសឲ្យដឹងពីសំណាក់ក្រុមហ៊ុនទាំងពីរដោយពុំបាន ផ្តល់ព័ត៌មានលម្អិតស្តីពីហិរញ្ញវត្ថុនៃការទិញលក់ក្រុមហ៊ុននេះទេ។
បង្កើតឡើងកាលពីឆ្នាំ ២០០១ ក្រុមហ៊ុន Mobile Technologies មានឈ្មោះល្បីក្នុងការបង្កើតកម្មវិធី Jibbigo mobile សម្រាប់ការប្រែសម្រួលភាសាដែលនិយាយទៅមករកគ្នា។
លោក Tom Stocky អគ្គនាយកគ្រប់គ្រងផលិតផលប្រចាំក្រុមហ៊ុន Facebook បានសរសេរក្នុងអត្ថបទចុះផ្សាយតាមប្រព័ន្ធអ៊ីនធឺណិតមួយថា៖ «ខ្ញុំមានសេចក្តីសោមនស្សក្នុងការប្រកាសថា យើងបានព្រមព្រៀងគ្នាទិញយកក្រុមហ៊ុន Mobile Technologies ដែលជាក្រុមហ៊ុនមួយមានក្រុមការងារជំនាញល្អ ដែលបានបង្កើតបច្ចេកវិទ្យាប្រែសម្រួលភាសាឈានមុខគេរបស់ពិភពលោក»។
លោកបានមានប្រសាសន៍ទៀតថា៖ «បច្ចេកវិទ្យាសំឡេងបានក្លាយជាមធ្យោបាយមួយកាន់តែសំខាន់សម្រាប់ មនុស្សក្នុងការប្រើប្រាស់ឧបករណ៍ចល័ត និងរុករកគេហទំព័រ ហើយបច្ចេកវិទ្យានេះ នឹងជួយយើងអភិវឌ្ឍផលិតផលរបស់យើងឲ្យត្រូវទៅតាមការវិវឌ្ឍនោះ»។
ក្នុងសេចក្តីថ្លែងការណ៍ផ្សេងមួយទៀត ក្រុមហ៊ុន Mobile Technologies បានឲ្យដឹងថា ខ្លួនរីករាយនឹងប្រកាសថា ក្រុមហ៊ុន Facebook បានព្រមព្រៀងទិញយកក្រុមហ៊ុន Mobile Technologies ហើយ ហើយនៅពេលដែលកិច្ចព្រមព្រៀងនេះបញ្ចប់នោះ យើងនឹងអាចចូលបម្រើការជាមួយនឹងក្រុមហ៊ុននេះនៅការិយាល័យកណ្តាល របស់ ពួកគេនៅទីក្រុង Menlo Park រដ្ឋ California»៕ BP
No comments:
Post a Comment