វិភាគ
៖ មិនមែនបក្សប្រឆាំងខ្លាំងទេ តែបក្សប្រជាជនប្រឈមបញ្ហាច្រើនពេក
ថ្មីៗ-១៣/០៨/២០១៣៖ ការកើនឡើងអាសនៈរបស់គណបក្សសង្គ្រោះជាតិរហូតដល់៥៥ទល់នឹង៦៨សម្រាប់ គណបក្សប្រជាជនកម្ពុជាដែលបានកាន់អំណាចជាង៣០ឆ្នាំមកហើយនោះបានធ្វើអោយ មតិជាតិ និងអន្តរជាតិភ្ញាក់ផ្អើល។ អ្នកវិភាគអះអាងថា ការហក់ឡើងយ៉ាងគំហុកនៃអាសនៈរបស់គណសង្គ្រោះជាតិនៅអាណត្តិនេះគឺ មិនមែនដោយសារតែគណបក្សប្រឆាំងខ្លាំងនោះទេ។ តាមពិតគឺដោយសារគណបក្សប្រជាជនកម្ពុជាដែលដឹកនាំយូរទៅ ប្រឈមនឹងបញ្ហាជាច្រើនដោះស្រាយមិនចេញ។
ប្រសិនបើគេពិនិត្យលើតួរង និងតួឯករបស់គណបក្សសង្គ្រោះជាតិ វាមិនមានអ្វីថ្មីទេ ពីព្រោះ លោក សម រង្ស៊ី មុននឹងបង្កើតគណបក្សជាតិខ្មែរនៅឆ្នាំ១៩៩៥ លោកធ្លាប់ជាតំណាងរាស្ត្រគណបក្សហ្វ៊ុនស៊ិនប៉ិច។ រីឯ លោក កឹម សុខា គឺជាអតីតសមាជិកគណបក្សលោកតា សឺន សាន និងជាអតីតសមាជិកតំណាងរាស្ត្រមកពីគណបក្សហ្វ៊ុនស៊ិនប៉ិច។ និយាយអោយខ្លីមានន័យថាតួរង និងតួឯកទាំងពីរធ្លាប់រស់នៅជាមួយគណបក្សហ្វ៊ុនស៊ិនប៉ិចដែលជាគណបក្សទទួលបរាជ័យជាបន្តបន្ទាប់ ក្នុងការប្រកួតប្រជែងសន្លឹកឆ្នោតជាមួយគណបក្សប្រជាជនកម្ពុជា ចាប់តាំងពីឆ្នាំ១៩៩៨មក។
ប្រសិនបើគេនិយាយពីទស្សនៈទាន និងគោលនយោបាយរបស់គណបក្សសង្គ្រោះជាតិដែលជាគណបក្សកើតចេញពីគណបក្ស សមរង្ស៊ី និងគណបក្សសិទ្ធិមនុស្សវិញ វាហាក់បីដូចជាមិនអស្ចារ្យណាស់ណាប៉ុន្មានទេ ពីព្រោះនេះគឺជាអ្វីដែលអ្នកនយោបាយអាចនិយាយបាន និង«អាចធ្វើបានដូចតែគ្នា»។ ម្យ៉ាងទៀត គណបក្សសង្គ្រោះ ក៏មិនទាន់មានធនធានមនុស្សគ្រប់គ្រាន់ និងមិនទាន់មានរចនាសម្ព័ន្ធរឹងមាំខ្លាំងក្លាដូចគណបក្សប្រឆាំងនៅក្នុង ប្រទេសអភិវឌ្ឍន៍នៅឡើយទេ។
ប្រសិនបើមើលទៅតួរង និងតួឯកនៃគណបក្សសង្គ្រោះជាតិមិនអស្ចារ្យមែន ចុះហេតុអ្វីបានជាអ្នកបោះឆ្នោតនាំគ្នាបោះគាំទ្រគណបក្សប្រឆាំងមួយ នេះ?
អ្នកតាមដានសភាពការណ៍សង្គមនយោបាយនៅក្នុងប្រទេសកម្ពុជាតាំងពី ដើមឆ្នាំ៩០មក បានអត្ថាធិប្បាយថា ការគាំទ្រគណបក្សប្រឆាំងខ្លាំងសម្រាប់អាណត្តិនេះ គឺដោយសារតែគណបក្សកាន់អំណាច(គណបក្សប្រជាជនកម្ពុជា)បានប្រឈមនឹងបញ្ហា សង្គមសេដ្ឋកិច្ចជាច្រើនរាប់មិនអស់ដោះស្រាយមិនចេញក្នុងរយៈពេលនៃការ កាន់អំណាចរបស់ខ្លួនពេញលេញតាំងពីឆ្នាំ១៩៩៨មក។
បញ្ហាដែលគណបក្សប្រជាជនកម្ពុជាប្រឈមមានច្រើន។ ប៉ុន្តែបញ្ហាធំៗដែលអាចនាំអោយគណបក្សកាន់អំណាចបាត់បង់ការគាំទ្រមាន ដូចតទៅ៖
ទី១ គឺដោយសារគណបក្សប្រជាជនកម្ពុជាប្រើប្រាស់អំណាចដែលខ្លួនមានទាំង នៅក្នុងរដ្ឋាភិបាល និងនៅក្នុងរដ្ឋសភាខ្លាំងពេកក្នុងអាណត្តិរបស់ខ្លួន មានន័យថា គណបក្សប្រជាជនកម្ពុជា ក្នុងការដឹកនាំ«កម្រ»នឹងស្តាប់សំឡេងរាស្ត្រ សង្គមស៊ីវិល និងសំឡេងគណបក្សប្រឆាំងណាស់។
ទី២ អំពើពុករលួយ (មន្ត្រីជាន់ខ្ពស់មួយចំនួនប្រព្រឹត្តិអំពើផ្តេសផ្តាសច្រើនពេក)។ រីឯ មន្ត្រីថ្នាក់ក្រោមបង្គាប់ប្រឈមនឹងភាពក្រីក្រ។
ទី៣ ប្រព័ន្ធតុលាការលម្អៀង(នៅពេលមានជម្លោះ អ្នកក្រីក្រភាគច្រើនចាញ់ក្តី រីឯអ្នកមានអំណាច និងមានប្រាក់ភាគច្រើនឈ្នះក្តី)។
ទី៤ សេវាសាធារណៈពីថ្នាក់ក្រោមដល់ថ្នាក់លើមិនសូវដំណើរការទេ។ មន្ត្រីតាមក្រសួងមួយចំនួនធំដែលគ្មានផលប្រយោជន៍មិនសូវមកបំពេញ កិច្ចការទេដោយសារតែការងារមួយចំនួនត្រូវបានគេប្រមូលផ្តុំទុកអោយ សម្រាប់តែមន្ត្រីនៅជុំវិញរដ្ឋមន្ត្រីឬរដ្ឋលេខាធិការប៉ុណ្ណោះ។ មន្ត្រីថ្នាក់ក្រោមឃុំសង្កាត់គៀបសង្កត់ប្រជាពលរដ្ឋដើម្បីទទួលបាន លាភសក្ការៈផ្ទាល់ខ្លួន។
ទី៥ បក្សពួក និងគ្រួសារនិយមកើតមានកាន់តែច្រើននៅតាមក្រសួង មានន័យថា ក្រសួងមួយចំនួនធំបានក្លាយទៅជាក្រសួងគ្រួសារនិយម(កូនចៅញាត្តិសន្តាន ធ្វើការនៅក្នុងក្រសួងកាន់តែច្រើន)។ ចំណោទនេះធ្វើអោយមន្ត្រីដែលគ្មានសែស្រឡាយបាក់ទឹកចិត្ត លែងមានអារម្មណ៍ចង់បម្រើការជូនរដ្ឋ។
ទី៦ អាជ្ញាធរភាគច្រើនប្រើប្រាស់អំណាច និងតួនាទី«ជ្រុលពេក»ជាមួយប្រជាពលរដ្ឋស្លូតត្រង់ឬអ្នកជំនួញ។
ទី៧ បញ្ហាដីធ្លី។ ប្រជាពលរដ្ឋខ្មែរមួយចំនួនបាត់បង់ដីធ្លីដោយសារតែការបណ្តេញចេញ ឬដោយសារតែ«សេល»នៃគម្រោងវិនិយោគផ្សេងៗ (ការទូទាត់សំណងមិនយុត្តិធម៌)។
ទី៧ ការតែងតាំងដោយប្រកាន់បក្សពួក សែស្រឡាយ និងប្រាក់កាស។ អ្នកមានចំណេះ តែខ្វះ«ទុយយោ» ឬមិនចេះអែបអបពិបាកនឹងទទួលបានតំណែងល្អ។
ទី៨ រដ្ឋាភិបាលមិនបានជួយដោះស្រាយបញ្ហាតម្លៃកសិផល មានន័យថា កសិករនៅតែប្រឈមនឹងតម្លៃកសិផលថោកដដែលបន្ទាប់ពីផលិតបាន។
ទី៩ រដ្ឋាភិបាលត្រូវបានប្រជាពលរដ្ឋ និងអ្នកនយោបាយមួយចំនួនចោទថា មិនបានដោះស្រាយបញ្ហាជនអន្តោប្រវេសន៍វៀតណាមអោយបានត្រឹមត្រូវ។
ទី១០ ការបាត់បង់ធនធានធម្មជាតិ(ព្រៃឈើ រ៉ែ មច្ឆាជាតិ។ល)។ ធនធានធម្មជាតិទាំងនេះ ជាលក្ខណៈសត្យានុម័ត្តជារបស់ប្រជាពលរដ្ឋទូទៅ។
ទី១១ រដ្ឋាភិបាលដែលដឹកនាំដោយគណបក្សប្រជាជនកម្ពុជាខកខានមិនបានបង្កើត ការងារគ្រប់គ្រាន់ជូននិស្សិតដែលចេញពីមហាវិទ្យាល័យ។
ទី១២ គឺដោយសារការកាន់តំណែងយូរពេករបស់លោកនាយករដ្ឋមន្ត្រី ហ៊ុន សែន តាំងពីឆ្នាំ១៩៨៥មក បើទោះបីជាការកាន់តួនាទីនេះធ្វើឡើងដោយអនុលោមទៅតាមការសម្រេចចិត្តរ បស់ប្រពលរដ្ឋក្តី។
ទី១៣ ប្រព័ន្ធផ្សព្វផ្សាយដែលកាន់កាប់ដោយបក្សប្រជាជនកម្ពុជាផ្តល់ដំណឹង មិនសូវអព្យាក្រិត្យ។ ភាពលម្អៀងនេះធ្វើអោយប្រជាពលរដ្ឋរឹតតែអោយតម្លៃ និងអាណិតអាសូរគណបក្សប្រឆាំងបន្ថែមទៀត។
ទី១៤ ការប្តឹងផ្តល់ធ្វើបាបលោក សម រង្ស៊ី និងសមាជិកជាន់ខ្ពស់នៃគណបក្សសង្គ្រោះជាតិដទៃទៀត ធ្វើអោយគណបក្សប្រឆាំងកាន់តែមានប្រជាប្រិយភាពបន្ថែមទៀត។ នៅក្នុងសង្គមខ្មែរ ប្រជាពលរដ្ឋមានទម្លាប់អាណិតអាសូរ និងជួយគាំទ្រជនណាដែលត្រូវគេធ្វើបាប។
ទី១៥ គឺជាបញ្ហាដែលប្រឈមខ្លាំងជាងគេនោះ គឺបញ្ហាសេដ្ឋកិច្ច។ កំណើនសេដ្ឋកិច្ចមានមែន៧%ប្រចាំឆ្នាំតាំងពីជាង១០ឆ្នាំមក។ ប៉ុន្តែទន្ទឹមនឹងកំណើនសេដ្ឋកិច្ចនេះ គម្លាតរវាងអ្នកមាន និងអ្នកក្រីក្ររីកកាន់តែធំឡើង។ អ្នកមានធនធាន(ថៅកែ)ទទួលបានផលច្រើនពីកំណើនសេដ្ឋកិច្ច រីឯប្រជាកសិករនៅជនបទទទួលបានផលតិចតួចបំផុតពីកំណើនសេដ្ឋកិច្ច។
ដោយសារតែគម្លាតរវាងអ្នកមាន និងអ្នកក្រីក្រ រវាងអ្នកទីក្រុង និងអ្នកជនបទកាន់តែរីកធំឡើងយ៉ាងដូច្នេះ ទើបនាពេលកន្លងមក «អ្នកមានជីវភាពទន់ខ្សោយ»តែងតែបោះឆ្នោតគាំទ្រគណបក្សប្រឆាំង។ តែសម្រាប់អាណត្តិទី៥នេះ ដោយសារតែបញ្ហាកើតមានកាន់តែច្រើន ហើយគណបក្សប្រជាជនកម្ពុជាមិនអាចដោះស្រាយបាននោះ សំឡេងមន្ត្រីរាជការស៊ីវិល នគបាល យោធា បញ្ញាវ័ន្ត អ្នកជំនួញមួយចំនួនបែរទៅបោះឆ្នោតគាំទ្រគណបក្សប្រឆាំងបន្ថែមទៀត។
តើប្រជាប្រិយភាពគណបក្សប្រជាជនកម្ពុជា និងគណបក្សប្រឆាំងសង្គ្រោះជាតិនឹងទៅជាយ៉ាងណាសម្រាប់អាណត្តិទី៦ឆ្នាំ២០១៨?
ប្រសិនបើលទ្ធផលផ្លូវការបង្ហាញថា អាណត្តិនេះ គណបក្សប្រជាជនកម្ពុជាទទួលបាន៦៨អាសនៈទល់នឹង៥៥អាសនៈសម្រាប់គណបក្ស សង្គ្រោះជាតិ(បើគិតជាសំឡេង ចំនួនខុសគ្នាតែ៣០ម៉ឺនប៉ុណ្ណោះ បក្សប្រជាជនកម្ពុជាទទួលបាន៣លាន២សែនសំឡេងទល់នឹង២លាន៩សែនសម្រាប់ បក្សប្រឆាំង) ចំនួននេះធ្វើអោយគណបក្សប្រជាជនកម្ពុជាដែលបន្តកាន់អំណាចពី ឆ្នាំ២០១៣ដល់ឆ្នាំ២០១៨ នឹង«ស្រៀវឆ្អឹងខ្នង»។
អ្នកតាមដានសភាពការណ៍សង្គមនយោបាយនៅក្នុងប្រទេសកម្ពុជាដដែលបាន បញ្ជាក់ថា ពេលនេះគឺជាពេលវេលាដែលគណបក្សប្រជាជនកម្ពុជាត្រូវធ្វើការកែទម្រង់ ពិតប្រាកដ។ កែទម្រង់នៅពេលនេះ គឺមិនមែនគ្រាន់តែនិយាយនៅលើបបូរមាត់ ឬសរសេរនៅលើក្រដាស់ទេ។ ប៉ុន្តែគណបក្សប្រជាជនកម្ពុជាត្រូវបង្ហាញអោយប្រជាពលរដ្ឋដែលជា ម្ចាស់ឆ្នោតឃើញជាក់ស្តែង។ ត្រង់ចំណុចនេះ សំណួរជាច្រើនបានលើកឡើងថា តើលោកនាយករដ្ឋមន្ត្រី ហ៊ុន សែន ត្រូវវះកាត់ជំងឺមហារីកដែលកើតមាននៅក្នុងរដ្ឋបាលរបស់លោកយ៉ាងដូចម្តេច?
តើលោកនាយករដ្ឋមន្ត្រីហ៊ានអារកាត់ដក ឬដាក់ទណ្ឌកម្មលើមន្ត្រីអសមត្ថភាព ឬប្រព្រឹត្តិកំហុសឬទេ? តើគណបក្សប្រជាជនកម្ពុជាមានគោលនយោបាយសេដ្ឋកិច្ចសម្រាប់គាំពារ ជនក្រីក្រឬទេ?
ប្រសិនបើគណបក្សប្រជាជនកម្ពុជាអាចព្យាបាលជំងឺ«មហារីក»ដែលវាយលុក រដ្ឋបាលរបស់ខ្លួនបាន ពេលនោះ ប្រជាប្រិយភាពរបស់គណបក្សកាន់អំណាចមួយនេះអាចរក្សានៅដដែល។ ប៉ុន្តែបើផ្ទុយពីនេះ «អំណាច»របស់គណបក្សប្រជាជនកម្ពុជាអាចធ្លាក់ចូលទៅក្នុងដៃរបស់«គណបក្ស សង្គ្រោះជាតិ»សម្រាប់អាណត្តិក្រោយ។
ងាកមកនិយាយពីគណបក្សប្រឆាំងសង្គ្រោះជាតិវិញ ប្រជាប្រិយភាពអាចប្រែប្រួលទៅតាមជំហររបស់គណបក្សមួយនេះនៅចំពោះមុខ គណបក្សប្រជាជន។ ប្រសិនបើគណបក្សសង្គ្រោះជាតិមានជំហរពិតប្រាកដមិន«លក់ខ្លួន» ពេលនោះ គណបក្សនេះអាចនឹងទទួលបានការគាំទ្រកាន់តែច្រើនឡើង តែបើបញ្ច្រាសវិញ ពេលនោះ គណបក្សប្រឆាំងក៏អាចទទួលវាសនាដូចគណបក្សហ្វ៊ុនស៊ិនប៉ិច ឬគណបក្សចាញ់ឆ្នោតដទៃផ្សេងៗទៀតដែរ៕
No comments:
Post a Comment