ឯកឧត្ដម កែប ជុតិមា មានចំណែកធំធ្វើឱ្យគណបក្សកាន់អំណាចបាត់សំឡេងឆ្នោតគាំទ្រនៅមណ្ឌលភ្នំពេញ ?
ដើមត្នោត ១៥-០៨-២០១៣៖ លទ្ធផលឆ្នោតបណ្ដោះអាសន្ននៃការបោះឆ្នោតជ្រើសតាំងតំណាងរាស្ដ្រ នីតិកាលទី៥ ដែលប្រកាសដោយគណៈកម្មាធិការជាតិរៀបចំការបោះឆ្នោត “គ.ជ.ប” កាលពីថ្ងៃទី១២ ខែសីហា ឆ្នាំ២០១៣កន្លងមក បានបង្ហាញថា នៅមណ្ឌលភ្នំពេញ គណបក្សប្រជាជនកម្ពុជាដែលជាគណបក្សនយោបាយកាន់កាប់អំណាច មានលុយកាក់ ទ្រព្យសម្បត្ដិមហាសាល និងអំណាចមហិមានោះ ទទួលបានសំឡេងឆ្នោតគាំទ្រសរុបចំនួន២៥៧. ៣៥១សំឡេង តិចជាងគណបក្សសង្គ្រោះជាតិដែលជាគណបក្សនយោបាយប្រឆាំង ក្រីក្រ គ្មានលុយកាក់ និងគ្មានអំណាចទទួលបានសំឡេងឆ្នោត គាំទ្រសរុបចំនួន ៣៨២.៨៨០សំឡេង ។
បើគណនាចំនួនអាសនៈតាមលទ្ធផលឆ្នោតបណ្ដោះអាសន្ននេះ គឺនៅមណ្ឌលភ្នំពេញ គណបក្សសង្គ្រោះជាតិនឹងទទួលបាន៧អាសនៈ រីឯគណបក្សប្រជាជនកម្ពុជានឹងទទួលបាន៥អាសនៈក្នុងចំណោមអាសនៈសរុប ចំនួន១២អាសនៈ ។
ថ្នាក់ដឹកនាំសំខាន់ៗរបស់គណបក្សប្រជាជនកម្ពុជាដែលបានឈរឈ្មោះជា បេក្ខជនតំណាងរាស្ដ្រពេញសិទ្ធិនៅមណ្ឌលភ្នំពេញ រួមមាន ៖ សម្ដេចអគ្គមហាធម្មពោធិសាល ជា ស៊ីម ប្រធានគណបក្សប្រជាជនកម្ពុជា, ឯកឧត្ដម គាត ឈន់ , ឯកឧត្ដម កែប ជុតិមា , ឯកឧត្ដម អ៊ិត សំហេង , ឯកឧត្ដម ម៉ម ប៊ុនហេង , ឯកឧត្ដម នាយឧត្ដមសេនីយ៍ផ្កាយមាសបួន ប្រាក់ សុខុន…។ល។
ក្នុងចំណោមថ្នាក់ដឹកនាំគណបក្សប្រជាជនកម្ពុជាដែលជាបេក្ខជនឈរឈ្មោះ តំណាងរាស្ដ្រនីតិកាលទី៥នៅមណ្ឌលភ្នំពេញទាំងនោះ គេមាន ការចាប់អារម្មណ៍ខ្លាំងទៅលើឯកឧត្ដម កែប ជុតិមា ដែលជាបេក្ខជនលំដាប់លេខរៀងទី៣ជាងគេ ពីព្រោះឯកឧត្ដមរូបនេះមុនមកឈរឈ្មោះ ជាបេក្ខជនតំណាងរាស្ដ្រ គឺបានកាន់មុខតំណែងជាអភិបាលនៃគណៈអភិបាលរាជធានីភ្នំពេញផ្ទាល់តែ ម្ដង និងជាទីប្រឹក្សាផ្ទាល់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា មានឋានៈស្មើរដ្ឋមន្ដ្រីថែមទៀត ។
ពេលនៅកាន់តំណែងជាអភិបាលនៃគណៈអភិបាលរាជធានីភ្នំពេញ ឯកឧត្ដម កែប ជុតិមា តែងបានទទួលរងនូវការរិះគន់យ៉ាងខ្លាំងពីអ្នករស់នៅរាជធានីភ្នំពេញ ថា ពុករលួយ បក្ខពួកនិយម ក្រអឺតក្រទម ដឹងតែប្រមូលលុយដាក់ហោប៉ៅ និងចែកថ្នាក់លើ ដើម្បីការពារអំណាចផ្ទាល់ខ្លួន ស្ពឹកស្រពន់លើកិច្ចការអភិវឌ្ឍន៍ តែចុះហត្ថលេខាលក់ ឬជួលដីរដ្ឋឱ្យក្រុមហ៊ុនឯកជនវិញគឺលឿនដូចព្យុះ ។ ឧទាហរណ៍ ដូចជាការចុះហត្ថលេខានៅ ថ្ងៃទី០៦ ខែកុម្ភៈ ឆ្នាំ២០០៧ ជួលទីតាំងដីបឹងកក់រយៈពេល៩៩ឆ្នាំស្មើនឹងទឹកប្រាក់ចំនួន៧៩.០០២.០០០ ដុល្លារអាមេរិក ឱ្យទៅក្រុមហ៊ុនស៊ូកាគូអ៊ីន របស់ឯកឧត្ដមឧកញ៉ា ឡាវ ម៉េងឃីន ស្វាមីជំទាវឧកញ៉ា ជឹង សុភាព ហៅយាយភូ អនុប្រធានទី២កាកបាទក្រហមកម្ពុជាអាណត្ដិទី៤ ធ្វើឱ្យអ្នក ភូមិបឹងកក់ក្ដៅក្រហាយទល់សព្វថ្ងៃ…។ល។
ឯកឧត្ដម ខៀវ កាញារីទ្ធ រដ្ឋមន្ដ្រីក្រសួងព័ត៌មាន និងក៏ជាបេក្ខជនតំណាងរាស្ដ្រពេញសិទ្ធិគណបក្សប្រជាជនកម្ពុជា លំដាប់លេខរៀងទី៤ នៅមណ្ឌលខេត្ដកំពង់ចាម បាន Post អត្ថបទខ្លីមួយកាលពីថ្ងៃទី១៤ ខែសីហា ឆ្នាំ២០១៣ នៅក្នុង Page Facebook របស់ឯកឧត្ដមថា “ព្រឹកមិញទៅបន់ស្រន់សុំសេចក្ដីសុខនៅព្រះអង្គដងកើមុខវាំង ។ បន្ទាប់មកក៏បានជជែកលេងជាមួយបងប្អូនអ្នកលក់ដូរមួយចំនួន មានដូចជា ៖ អ្នកបោសសំរាម អ្នកលក់ភេសជ្ជៈ អ្នកលក់ផ្កា អ្នកលក់សណ្ដែកដី និងអ្នកលក់សត្វចាប ជាដើម ហើយពួកគាត់បានឱ្យដឹងថា កាលពីជំនាន់លោក ជា សុផារ៉ា ជាអភិបាលក្រុងភ្នំពេញ គឺតែងយកចិត្ដទុកដាក់ និងផ្ដល់ការលើកទឹកចិត្ដដល់កម្មករបោសសំរាម និងសន្ដិសុខ ដោយមកសួរសុខទុក្ខដល់ពួកគាត់ និងឧស្សាហ៍ផ្ដល់ជាថវិកាបន្ដិចបន្ដួចផងដែរ ។ ចំណែកអតីតអភិបាលក្រុងដែលទើបបានផ្លាស់ប្ដូរ និងអនាគតជាតំណាងរាស្ដ្រក្រុងភ្នំពេញ គឺមិនចេះញញឹមរាក់ទាក់ ឬសួរសុខទុក្ខពួកគាត់ទេ ដើរងើយមុខឡើងរហូតពេលមួយនេះបានដើរជាន់អាចម៍ឆ្កែ ។…” ។
ទោះបីការលើកឡើងនៅក្នុង Page Facebook របស់ឯកឧត្ដម ខៀវ កាញារីទ្ធ មិនបានបញ្ជាក់ឱ្យចំឈ្មោះក៏ដោយ ក៏បានផ្ដោតសំដៅរួចហើយថាជាឯកឧត្ដម កែប ជុតិមា អតីតអភិបាលនៃគណៈអភិបាលរាជធានីភ្នំពេញ និងជាអនាគតតំណាងរាស្ដ្រមណ្ឌលរាជធានីភ្នំពេញ ដែលដើរងើយមុខឡើងលើរហូតបានដើរជាន់អាចម៍ឆ្កែ…។
មជ្ឈដ្ឋានអ្នកតាមដានព្រឹត្ដិការណ៍នយោបាយនៅកម្ពុជា បានលើកឡើងថា អំពើរបស់ឯកឧត្ដម កែប ជុតិមា កាលនៅកាន់តំណែងជាអភិបាលនៃគណៈអភិបាលរាជធានីភ្នំពេញ ដែលជាបេះដូងនៃព្រះរាជាណាចក្រកម្ពុជា ហើយឥឡូវមកឈរឈ្មោះជាបេក្ខជនតំណាងរាស្ដ្រនៅមណ្ឌលរាជធានីភ្នំពេញទៀត នោះ គឺពិតជាមានចំណែកមួយយ៉ាងធំដែលធ្វើឱ្យគណបក្សប្រជាជនកម្ពុជាបាត់ សំឡេងឆ្នោតគាំទ្រនៅមណ្ឌលរាជធានីភ្នំពេញ ចាញ់គណបក្សប្រឆាំងរហូតដល់ចំនួន១២៥.៥២៩សំឡេង ស្មើនឹងចំនួន២អាសនៈ ។
គួររំលឹកជូនថា នាសម័យបោះឆ្នោតជ្រើសតាំងតំណាងរាស្ដ្រនីតិកាលទី៤“២០០៨-២០១៣”កន្លង មក គណបក្សប្រជាជនកម្ពុជាទទួលបានអាសនៈចំនួន៧អាសនៈ ខណៈដែលគណបក្សប្រឆាំង“អតីតគណបក្សសម រង្ស៊ី” ទទួលបានអាសនៈចំនួន៥អាសនៈ ក្នុងចំណោមអាសនៈសរុបចំនួន១២អាសនៈនៅមណ្ឌលរាជធានីភ្នំពេញ ៕
No comments:
Post a Comment