កសិករថៃយល់ព្រមតាមសំណើរដ្ឋាភិបាល
ភ្នំពេញប៉ុស្តិ៍ ១៤-០៨-២០១៣៖ ក្រុមកសិករនៅប្រទេសថៃបានថ្លែងឲ្យដឹងថា ពួកគេមានឆន្ទៈទទួលយកសំណើចុងក្រោយរបស់រដ្ឋាភិបាលក្នុងការបន្ត ទិញស្រូវក្នុងតម្លៃ ១៥ ពាន់បាតក្នុងមួយតោន ស្ថិតក្រោមគម្រោងសន្យាទិញស្រូវរបស់រដ្ឋាភិបាលថៃក្នុងរដូវ ប្រមូលផលឆ្នាំ ២០១៣-២០១៤ ដែលបានកាត់បន្ថយការទិញស្រូវនេះមកនៅត្រឹមតែម្តងប៉ុណ្ណោះក្នុង មួយឆ្នាំ។តែក្រុមកសិករទាំងនោះទាមទារឲ្យរដ្ឋាភិបាលលើកកម្ពស់ដំណើរការ ទិញស្រូវតាមការសន្យា ដោយអនុញ្ញាតឲ្យអ្នកតំណាងរបស់កសិករ ចូលរួមពិនិត្យគុណភាពអង្ករ និងកម្រិតសំណើម ក៏ដូចជាវិធីសាស្រ្តរក្សាទុកស្រូវរបស់ក្រុមហ៊ុនកែច្នៃអង្ករ។
រដ្ឋាភិបាល ក៏គប្បីគាំទ្រកសិករដោយជួយដល់ពួកគេដាំស្រូវដែលមានគុណភាព ខ្ពស់ និងកាត់បន្ថយថ្លៃដើមផលិតរបស់ខ្លួន និងកាត់បន្ថយការប្រើប្រាស់ជីគីមីផងដែរ។
លោក Prapat Panyachartraksa ប្រធានក្រុមប្រឹក្សាកសិករជាតិរបស់ថៃបានមានប្រសាសន៍ថា៖ «បន្ទាប់ពីកិច្ចពិភាក្សាជាច្រើនលើកជាមួយអ្នកតំណាងរបស់កសិករមកពី តំបន់ផ្សេងៗ ពួកគេបានឲ្យដឹងថា សំណើលើកចុងក្រោយនេះគឺអាចទទួលយកបានដោយកសិករភាគច្រើននៅតំបន់ ភាគខាងជើង និងឦសាន និងក្រុមកសិករនៅខាងក្រៅតំបន់ធារាសាស្រ្ត អាចធ្វើស្រែបានតែម្តងប៉ុណ្ណោះក្នុងមួយឆ្នាំ»។
លោកបានមានប្រសាសន៍ទៀតថា៖ «ក្រុមកសិករដែលរងផលប៉ះពាល់នោះ គឺជាក្រុមកសិករ ដែលស្ថិតនៅតំបន់កណ្តាលដែលមានប្រព័ន្ធធារាសាស្រ្តល្អ អាចធ្វើស្រែបានច្រើនដងក្នុងមួយឆ្នាំ»។
លោក Prasit Booncheuy ប្រធានសមាគមកសិករដាំដំណាំស្រូវរបស់ថៃ បានយល់ស្របថា រដ្ឋាភិបាលទំនងជាប្រឈមនឹងការតវ៉ាយ៉ាងខ្លាំងពីក្រុមកសិករនៅ តំបន់ កណ្តាលនេះ។
លោកបានថ្លែងបន្តថា៖ «ក្រុមកសិករនៅភាគឦសាននឹងទទួលយកសំណើលើកចុងក្រោយរបស់រដ្ឋាភិបាល ដោយសារការចំណាយផលិតកម្មរបស់ពួកគាត់មានត្រឹមតែ ៤៥០០ បាតទៅ ៥៥ ០០០ បាតប៉ុណ្ណោះក្នុងមួយតោន»។
លោក Niwatthamrong Bunsongphaisan រដ្ឋមន្ត្រីក្រសួងពាណិជ្ជកម្មថៃ បានឲ្យដឹងកាលពីសប្តាហ៍មុនថា រដ្ឋាភិបាលអាចបន្តទិញស្រូវពីកសិករក្នុងតម្លៃ ១៥ ពាន់បាតក្នុងមួយតោន ក្រោមគម្រោងសន្យាទិញស្រូវរបស់រដ្ឋាភិបាលនៅរដូវប្រមូលផល ឆ្នាំ ២០១៣-២០១៤ ដោយកាត់បន្ថយការទិញស្រូវមកនៅត្រឹមតែម្តងប៉ុណ្ណោះក្នុងមួយ ឆ្នាំ៕ BP
No comments:
Post a Comment