ADB ផ្តល់ជំនួយ និងកម្ចី ២៣០ លានដុល្លារ ដើម្បីលើកកម្ពស់កំណើនសេដ្ឋកិច្ច នៅកម្ពុជា
RFI Khmer-17/01/2013: កិច្ចព្រមព្រៀងទាំង៦ គម្រោង មានទឹកប្រាក់សរុប ២៣០ លានដុល្លារ ជាជំនួយឥតសំណង និងប្រាក់កម្ចីការប្រាក់ទាប របស់ធនាគារអភិវឌ្ឍន៍អាស៊ី ADB ផ្តល់ឲ្យរាជរដ្ឋាភិបាលកម្ពុជា បានចុះហត្ថលេខា កាលពីព្រឹកថ្ងៃព្រហស្បតិ៍នេះ នៅទីស្តីការក្រសួងសេដ្ឋកិច្ច និងហិរញ្ញវត្ថុ ក្នុងទីក្រុងភ្នំពេញ។
លោកឧបនាយករដ្ឋមន្ត្រី គាត ឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានអង្គុយទន្ទឹមនឹងលោក Eric Sidgwick នាយកធនាគារអភិវឌ្ឍន៍អាស៊ី ប្រចាំប្រទេសកម្ពុជា និងបានចុះហត្ថលេខាលើកិច្ចព្រមព្រៀងរួមនោះ។
សេចក្តីប្រកាសលើកឡើងថា កិច្ចព្រមព្រៀង ដែលមានទឹកប្រាក់ ២៣០ លានដុល្លារ គឺសម្រាប់គម្រោងអភិវឌ្ឍន៍ចំនួន ៦ មានដូចជា ទី១-កម្មវិធីលើកកម្ពស់ពិពិធកម្មសេដ្ឋកិច្ច ទី២-កម្មវិធីវិមជ្ឈការសេវាសាធារណៈ និងការគ្រប់គ្រងហិរញ្ញវត្ថុ ទី៣-កម្មវិធីអភិវឌ្ឍន៍វិស័យអប់រំជំហានទី៣ ទី៤-កម្មវិធីអភិវឌ្ឍន៍ទីប្រជុំជននៃច្រករបៀងសេដ្ឋកិច្ច ភាគខាងត្បូង របស់មហាអនុតំបន់ទន្លេមេគង្គ ទី៥-គម្រោងគ្រប់គ្រង និងកាត់បន្ថយគ្រោះភ័យ នៃគ្រោះមហន្តរាយទឹកជំនន់ និងគ្រោះរាំងស្ងួតក្នុងមហាអនុតំបន់ទន្លេមេគង្គ ព្រមទាំងគម្រោងទី៦-វិស័យពង្រីកការបញ្ផូនថាមពល តាមអនុប្រព័ន្ធ ដែលមានកម្លាំងវ៉ុលតាមធ្យម។
កិច្ចព្រមព្រៀង ដែលបានចុះហត្ថលេខានៅថ្ងៃនេះ គឺជាសមិទ្ធផលដ៏សំខាន់មួយ នៅក្នុងភាពជាដៃគូរយៈពេល ២០ឆ្នាំ រវាងរាជរដ្ឋាភិបាលកម្ពុជា និងធនាគារអភិវឌ្ឍន៍អាស៊ី នៅក្នុងការពង្រីកគំនិតផ្តួចផ្តើមអភិវឌ្ឍន៍នានា សំដៅកាត់បន្ថយភាពក្រីក្រ និងកសាងនូវកំណើនសេដ្ឋកិច្ច ប្រកបដោយចីរភាព។ នេះបើតាមការដកស្រង់ប្រសាសន៍របស់លោក គាត ឈន់ មកចុះផ្សាយដោយប្រកាសព័ត៌មាន។
ចំណែកលោក Eric Sidgwick នាយកធនាគារអភិវឌ្ឍន៍អាស៊ី ប្រចាំប្រទេសកម្ពុជា ដែលបានចុះហត្ថលេខាលើកិច្ចព្រមព្រៀងនេះ តំណាងឱ្យធនាគារអភិវឌ្ឍន៍អាស៊ី បានមានប្រសាសន៍ថា “គំនិតផ្តួចផ្តើមទាំងនេះ នឹងលើកកម្ពស់គុណភាពជីវិតរបស់ប្រជាពលរដ្ឋក្រីក្រ និងងាយរងគ្រោះ ជំរុញឱ្យមានការអភិវឌ្ឍន៍សេដ្ឋកិច្ច តាមរយៈការជួយរដ្ឋាភិបាល ក្នុងការកែទម្រង់គោលនយោបាយ និងវិធានការនានាសម្រាប់ពង្រីកបន្ថែមទៀតនូវពាណិជ្ផកម្ម និងការវិនិយោគ ការធ្វើពិពិធកម្មមូលដ្ឋានសេដ្ឋកិច្ចរបស់ប្រទេស និងជួយធ្វើឱ្យប្រទេសកម្ពុជាប្រែក្លាយជាសេដ្ឋកិច្ចទីផ្សារ ដែលមានលក្ខណៈបើកចំហរ”៕
No comments:
Post a Comment