សេចក្តីព្រាងច្បាប់ថវិកាជាតិ ឆ្នាំ២០១៣ កំពុងឆ្លងរដ្ឋសភាដោយស្រួល
RFI Khmer-06/12/2012: សេចក្តីព្រាងច្បាប់ថវិកាជាតិ ឆ្នាំ២០១៣ ដែលមានទឹកប្រាក់ចំណាយសរុបប្រមាណ ៣.០០០ លានដុល្លារ មាន ៦ ជំពូក និង ១៨ មាត្រា នឹងត្រូវរដ្ឋសភាបើកកិច្ចប្រជុំពិភាក្សាបន្ត នៅព្រឹកថ្ងៃសុក្រ ទី៧ ខែធ្នូ ឆ្នាំ២០១២។ ក្នុងកិច្ចប្រជុំនៅព្រឹកមិញ សមាជិករដ្ឋសភាបានអនុម័តលើជំពូកទី១ ដែលមាន ៦ មាត្រា។ សមាជិកសភាគណបក្សសមរង្ស៊ី លោក សុន ឆ័យ លោក យឹម សុវណ្ណ និងលោកស្រី មូរ សុខហួរ បានឡើងធ្វើបទអន្តរាគមន៍ ដោយស្នើសុំឲ្យរដ្ឋសភាតម្រូវឲ្យរាជរដ្ឋាភិបាលកាត់បន្ថយនូវ ការខ្ចីបំណុលបរទេស ហើយបង្កើនប្រសិទ្ធភាពក្នុងការប្រមូលពន្ធ ដូចជា ពន្ធលើដីសម្បទានសេដ្ឋកិច្ច ពន្ធលើការនាំចូលប្រេង ពន្ធលើកាស៊ីណូ បង្កើនការយកពន្ធគយ និងចំណូលពីអ្នកទេសចរបរទេស នៅអង្គរវត្ត ជាដើម។
សមាជិកសភាគណបក្សប្រឆាំងអះអាងថា រដ្ឋាភិបាលអាចនឹងបង្កើតប្រាក់ចំណូលបានដោយងាយស្រួល ដោយគ្រាន់តែបង្កើនប្រសិទ្ធភាព ប្រមូលពន្ធលើអ្នកមាន ដូចជាពន្ធលើដីសម្បទានសេដ្ឋកិច្ចសម្រាប់ក្រុមហ៊ុនឯកជន និងពន្ធលើកាស៊ីណូជាដើម ដើម្បីបង្វែរការចំណាយទៅដល់អ្នកក្រីក្រពិតប្រាកដ។ ក៏ប៉ុន្តែ សមាជិកសភាគណបក្សប្រជាជនកម្ពុជា រួមមាន៖ លោក ជាម យៀប លោក ម៉ុម ជឹមហ៊ុយ និងលោក ឈាង វុន បានឡើងថ្លែងតបតនឹងសមាជិកសភាគណបក្សប្រឆាំង ហើយលើកអំណះអំណាងការពាររាជរដ្ឋាភិបាល។ រីឯលោកឧបនាយករដ្ឋមន្ត្រី គាត ឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក៏បានថ្លែងការពារសេចក្តីព្រាងច្បាប់ថវិកាជាតិផងដែរ។
យ៉ាងណាក៏ដោយ ទោះបីជាមានការពិភាក្សាតឹងសរសៃករវាងសមាជិកសភាគណបក្សសមរង្ស៊ី និងសមាជិកសភាគណបក្សប្រជាជនកម្ពុជា ក៏ដូចជា ការឆ្លើយតបរបស់លោក គាត ឈន់ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដែលបានចូលការពារសេចក្តីព្រាងច្បាប់ថវិកាជាតិ ក៏ប៉ុន្តែ សេចក្តីព្រាងច្បាប់នោះមិនត្រូវបានកែសម្រួលមួយតួអក្សរឡើយ។ សេចក្តីព្រាងច្បាប់ថវិកាជាតិ ឆ្នាំ២០១៣ មាន ៦ ជំពូក និង ១៨ មាត្រាបានកំណត់ពីការចំណាយសរុបរហូតដល់ ១២.០៩៥.០៧៣,៣ លានរៀល ដែលស្មើប្រមាណ ៣.០០០ លានដុល្លារអាមេរិក។ ថវិកាចំណាយសរុប ឆ្នាំ២០១៣ បានកើនឡើង ១២,៩% ធៀបនឹងច្បាប់ស្តីពីហិរញ្ញវត្ថុសម្រាប់ការគ្រប់គ្រង ឆ្នាំ២០១២។
ច្បាប់ថវិកាជាតិ ឆ្នាំ២០១៣ រដ្ឋាភិបាល បានបង្កើនការចំណាយលើគ្រប់វិស័យ ជាពិសេសក្រសួងអាទិភាព រួមមាន៖ ក្រសួងការពារជាតិ ចំនួន ៩៨០.៥១៥ លានរៀល ស្មើនឹង ២៤៥ លានដុល្លារ ក្រសួងមហាផ្ទៃ សន្តិសុខសាធារណៈ មានចំនួន ៦២០.១២៥ លានរៀល ស្មើនឹង ១៥៥ លានដុល្លារ ក្រសួងសុខាភិបាលមានចំនួន ៩០១.៥០០,៩ លានរៀល ស្មើនឹង ២២៥ លានដុល្លារ ក្រសួងអប់រំ យុវជន និងកីឡា មានចំនួន ១.១១៩.៥៦៥,៥ លានរៀល ស្មើនឹង ២៨០ លានដុល្លារ និងក្រសួងសង្គមកិច្ច អតីតយុទ្ធជន និងយុវនីតិសម្បទា មានចំនួន ៤១១.០៣២,៨ លានរៀល ស្មើនឹង ១០៣ លានដុល្លារ។
ក្នុងការចំណាយសរុបរបស់រដ្ឋាភិបាលជាង ៣.០០០ លានដុល្លារនោះ គឺមានខ្ទង់ចំណាយមិនទាន់បែងចែក ដែលមានចំនួន ៥.៦២៨.៩២៦ លានរៀល ស្មើនឹង ១.៤០៧ លានដុល្លារ។ ក្នុងនោះ មានចំណាយមិនបានគ្រោងទុក មានចំនួន ៤៥២.៣៣៣ លានរៀល ស្មើនឹង ១១៣ ដុល្លារ។ សេចក្តីព្រាងច្បាប់ថវិកាជាតិ ឆ្នាំ២០១៣ ក៏បានអនុញ្ញាតឲ្យរដ្ឋាភិបាលកម្ពុជា ខ្ចីបំណុលបរទេស ចំនួន ៦០០ លាន SDR ស្មើជាង ៩១៥ លានដុល្លារអាមេរិកដែលកាលពីឆ្នាំ២០១២ កំណត់ឲ្យរដ្ឋាភិបាលខ្ចីបំណុល ចំនួន ៧០០ លាន SDR។ ពីខេត្តរតនគិរី ក្នុងពិធីសម្ពោធផ្លូវជាតិលេខ៧៨ លោកនាយករដ្ឋមន្ត្រី ហ៊ុន សែន បានថ្លែងក្តីសង្ឃឹមថា ច្បាប់ថវិកាជាតិ ឆ្នាំ២០១៣ នឹងឆ្លងកាត់រដ្ឋសភា ដោយគ្មានឧបសគ្គ។ មូលហេតុ មកពីសមាជិកសភាគណបក្សប្រជាជនកម្ពុជា មានសំឡេង ៩០ លើ ១២៣ សំឡេង នៅរដ្ឋសភា។ រីឯការអនុម័តច្បាប់អ្វីមួយ ត្រូវការសំឡេងគាំទ្រ ត្រឹមតែ ៦៣ សំឡេងប៉ុណ្ណោះ៕
No comments:
Post a Comment