ចលាចលនៅលើទឹកដីព្រះចៅហ្វារ៉ាអុងដ៍ល្បីល្បាញនៃប្រាសាទពីរ៉ា មីត ការបំបែកហ្វូងបាតុករក្លាយជាការបង្ហូរឈាមយ៉ាងសាហាវនៅក្នុងប្រទេស អេហ្ស៊ីប ត្រឹមថ្ងៃ15សីហាតួលេខផ្លូវការស្លាប់464នាក់ តែក្រុមបាតុករថាស្លាប់2.200នាក់ និងរបួសជាង1ម៉ឺននាក់
កោះសន្តិភាព ១៦-០៨-២០១៣៖ រឿងក្ដៅដែលពិភពលោកកំពុងតែតាមដាននេះ គឺការបង្ក្រាបបាតុកម្មនៅក្នុងប្រទេសអេហ្ស៊ីប បន្ទាប់ពីក្រុមយោធាបានដាក់ឱសានវាទដល់ក្រុមអ្នក ធ្វើបាតុកម្មរាប់សែននាក់ឱ្យបំបែកជួរក្នុងការគាំទ្រ ប្រធានាធិបតីម័រស៊ី ដែលត្រូវបានដកហូតអំណាចចេញនោះ។ ការឈានដល់ប្រតិបត្តិការបំបែកជួរបាតុករ បានឈានដល់ការកើតមានចលាចលមួយដែលនោះគឺការប្រឈមមុខគ្នា រវាងក្រុមសន្ដិសុខ និងបាតុករ ។
សម្រាប់កម្ពុជាគឺយើងមិនចង់ឃើញទិដ្ឋភាពបែប នេះទេ ខណៈដែលនិន្នាការប្រឆាំងខ្លះនិយាយមិនដាច់ពីមាត់ពីការ ធ្វើមហាបាតុកម្ម
តែនិន្នាការ ជាតិទាំងមូលមិនគាំទ្រការបង្កចលាចលណាមួយក្នុងសង្គមនោះទេ ពិសេសគឺការបំផ្លាញជីវភាពសង្គម
។ នេះគឺជារឿងជាក់ស្ដែងមួយដែលកំពុងកើតឡើងនិងអាចបង្ហាញ ច្បាស់ថា
តើគប្បីប្រព្រឹត្តបែបណាដើម្បីភាពសុខសាន្តរបស់ជាតិ ។
តាមតួលេខផ្លូវការថា មនុស្ស៤៦៤នាក់បានត្រូវសម្លាប់កាលពីថ្ងៃទី១៤
សីហា នៅអេហ្ស៊ីបក្នុងការបំបែកដោយបង្ហូរឈាមនាទីក្រុងគែរ នូវបាតុកម្មទាមទារការវិលត្រឡប់ទៅកាន់អំណាចវិញរបស់ប្រធានាធិបតី អ៊ិស្លាមនិយម លោក
ម៉ូហាម៉េដ ម័រស៊ី ដែលត្រូវកងទ័ពផ្តួលរំលំ និងក្នុងអំពើហិង្សាទាំងឡាយដែលរាលដាលយ៉ាងឆាប់រហ័សក្នុងទូទាំង ប្រទេស
។អាជ្ញាធរគូសបញ្ជាក់ថា ក្រៅពីជនស៊ីវិល ប៉ូលិស៤៣នាក់បានត្រូវស្លាប់ក្នុងទូទាំងប្រទេស។ ក៏ប៉ុន្តែតុល្យការពិតណាស់មានខ្ពស់ជាងនេះទៀត ដោយអ្នកកាសែតរបស់
AFP ម្នាក់រាប់ឃើញសាកសពមនុស្សដល់ទៅ១២៤នាក់ គ្រាន់តែនៅឯទីលាន
RABAA Al-ADAWIYA ជាទីលានបោះជំរំតវ៉ារបស់ពួកអ្នកគាំទ្រលោក
ម័រស៊ី មួយប៉ុណ្ណោះ ។
នៅទីនោះក្រសួងសុខាភិបាលអេហ្ស៊ីបរៀបរាប់ពីមនុស្សស្លាប់៦១នាក់ ។
នៅពេលដែលជ័យលាភីពានរង្វាន់ណូបែលសន្តិភាព លោក ម៉ូហាម៉េដ
អែលបារ៉ាដេ បានសុំលាលែងចេញពីតំណែងអនុប្រធានាធិបតី ដោយបដិសេធមិនទទួលខុសត្រូវចំពោះបណ្តាផលវិបាកនៃការសម្រេចចិត្ត បង្ក្រាបបាតុកម្មដោយបង្ហូរឈាមជាសេចក្តីសម្រេចចិត្ត ដែលលោកមិនយល់ស្របតាម
នាយករដ្ឋមន្ត្រីនៃរដ្ឋាភិបាលបណ្តោះអាសន្ន លើកបន្តុបដោយកងទ័ពលោក ហាហ្សេម
បេផ្លាវី បែរជាសម្តែងការអបអរសាទរដល់កងកម្លាំងប៉ូលិសដែលខិតខំអត់ធ្មត់ ខ្មាំងបំផុត ។
ក្រោយទិវានៃការប៉ះទង្គិចគ្នាយ៉ាងបង្ហូរឈាម មក
អាជ្ញាធរអេហ្ស៊ីបបានចេញការប្រកាសអាសន្នទូទាំងប្រទេស ហើយដាក់បំរាមគោចរក្នុងខេត្តក្រុងពាក់កណ្តាល ក្នុងនោះមានទាំងទីក្រុងគែរ
និងក្រុងអាឡិចសង់ឌ្រីផងដែរ ។ ចំណែកមនុស្ស៥៤៣នាក់ចាប់ខ្លួន។
១ម៉ោងក្រោយបំរាមគោចរចូលជាធរមាន បណ្តាអ្នកទទួលខុសត្រូវខាងសន្តិសុខគូសបញ្ជាក់ថា ភាពស្ងប់ស្ងាត់កើតមានឡើងវិញទូទាំងប្រទេស
។
ភាពស្ងប់ស្ងាត់អាចគ្រាន់តែបណ្តោះអាសន្ន ដោយភាពតានតឹងនៅតែមានខ្ពស់ក្នុងប្រទេស ព្រោះពួកអ៊ិស្លាមនិយមបានអំពាវនាវឱ្យមានបាតុកម្មថ្មីៗទៀត ចំណែកកងកម្លាំងសន្តិសុខបានព្រមានថា ខ្លួននឹងមិនអនុញ្ញាតឱ្យមានការបោះទីតាំងតវ៉ាទៀតឡើយ ក្រោយពីវាយលុកដណ្តើមត្រួតត្រាទីតាំងបោះជំរំធ្វើបាតុកម្ម២ កន្លែងនៅទីក្រុងគែរ
ជាកន្លែងពួកអ្នកគាំទ្រលោក ម័រស៊ី បោះជំរំនៅទីនោះចាប់តាំងពី១ខែកន្លះមកហើយ
។
សហគមន៍អន្តរជាតិដែលប៉ុនប៉ងធ្វើអាជ្ញាកណ្តាល ចៀសវាងកុំឱ្យមានការបង្ហូរឈាមគ្នាបានថ្កោលទោសការប្រើអំពើ ហិង្សា ដើម្បីកម្ទេចកន្លែងប្រមូលផ្តុំពួកអ៊ិស្លាមនិយមច្រើនពាន់នាក់ធ្វើ បាតុកម្ម
ដែលមានទាំងនារី និងកុមារចូលរួមផង ។ នៅក្រុងវ៉ាស៊ីនតោន
រដ្ឋមន្ត្រីការបរទេសអាមេរិកលោក ចន គ័រវី បានថ្កោលទោសចំពោះការបង្ហូរឈាមនេះថា
ជារឿងគួរឱ្យអាម៉ាស់ ។ ចំណែកប្រមុខការទូតសហភាពអឺរ៉ុបលោកស្រី កាតឺរីន
អាស្តុន ទាមទារឱ្យលុបចោលការប្រកាសអាសន្នឱ្យបានឆាប់បំផុតតាមដែលអាចធ្វើ ទៅបាន ។
នៅទីលាន RABAA
អ្នកកាសែត AFP ម្នាក់រាប់ឃើញសាកសពមនុស្ស១២៤នាក់
ក្នុងនោះច្រើននាក់ស្លាប់ដោយគ្រាប់កាំភ្លើង
។ ចំណែកអ្នកយកព័ត៌មានឱ្យទូរទស្សន៍អង់គ្លេស
SKY NEWS ម្នាក់ក៏ស្លាប់ដោយគ្រាប់កាំភ្លើងដែរ
។ ក្រុមបងប្អូនអ៊ិស្លាមប្រកាសថា សរុបមនុស្សដល់ទៅ២.២០០នាក់ឯណោះត្រូវស្លាប់ ហើយជាង១០.០០០នាក់ត្រូវរបួស
។
ក្រោយការបំបែកទីតាំងបោះជំរំធ្វើបាតុកម្មទាំង ២កន្លែងនៅទីក្រុងគែរ ការប៉ះទង្គិចគ្នានានាកើតមានក្នុងសង្កាត់ផ្សេងៗនៃទីក្រុងគែរ ហើយមានមនុស្សស្លាប់ជាច្រើននាក់ក្នុងខេត្តដទៃៗទៀតរបស់ប្រទេស
។ នៅក្រុងអាឡិច
សាន់ឌ្រី ជាទីក្រុងធំទី២ របស់ប្រទេសមានសេចក្តីរាយការណ៍ពីការបាញ់តគ្នាខ្លាំងក្លាដោយ អាវុធស្វ័យប្រវត្តិ
។ ម្យ៉ាងវិញទៀត ព្រះវិហារគ្រឹស្តយ៉ាងតិច៤ រងការវាយប្រហារ
ដោយពួកគ្រឹស្តនិយាយថា ពួកអ្នកគាំទ្រលោក ម័រស៊ី
បានធ្វើសង្គ្រាមសងសឹកមួយប្រឆាំងពួកគ្រឹស្ត ។
អគ្គលេខាធិការ
អ.ស.ប លោក បាន គីមួន ក្នុងពាក្យម៉ឺងម៉ាត់បានថ្កោលទោសចំពោះអំពើបង្ក្រាបដោយហិង្សា និងយ៉ាងបង្ហូរឈាមនោះ ហើយលោកស្នើដល់ពលរដ្ឋអេហ្ស៊ីបឱ្យធ្វើការខិតខំប្រឹងប្រែងជំរុញ ការបង្រួបបង្រួមជាតិ
។ ប្រធានាធិបតីតួកគី លោក អាប់ឌុលឡាហ៍ ហ្គុល ចាត់ទុកថា ជាប្រការមិនអាចទទួលយកបានចំពោះអន្តរាគមន៍ដោយអាវុធប្រឆាំងបណ្តាជន ស៊ីវិលដែលធ្វើបាតុកម្ម
។ លោកបានប្រៀបធៀបរឿងនោះទៅនឹងការចាប់ផ្តើមតវ៉ានៅប្រទេសស៊ីរី មុនពេលក្លាយទៅជាសង្គ្រាមស៊ីវិល។ ប្រទេសកាតាជាអ្នកគាំទ្រយ៉ាងសកម្មដល់ក្រុមបងប្អូនអ៊ិស្លាមនោះ បានបរិហារយ៉ាងខ្លាំងចំពោះអន្តរាគមន៍របស់ប៉ូលិសប្រឆាំងពួកបាតុ ករ៕
No comments:
Post a Comment