ម្ចាស់យីហោក្នុងស្រុកបង្កើនការពង្រឹងគុណភាពដើម្បីប្រកួតប្រជែង
ភ្នំពេញប៉ុស្តិ៍ ០៤-០៩-២០១៣
ភ្នំពេញៈ ហាង កាហ្វេ និង ភោជនីយដ្ឋានក្នុងស្រុកដែលមានស្តង់ដារខ្ពស់នៅកម្ពុជាមានវត្តមាន កាន់តែច្រើន ហើយបាននឹងកំពុងពង្រីកអាជីវកម្មរបស់ខ្លួនជាបន្តបន្ទាប់នៅ ភ្នំពេញនារយៈពេលមួយឆ្នាំចុងក្រោយនេះ ខណៈហាងម៉ាកយីហោល្បីល្បាញកម្រិតអន្តរជាតិ ក៏កំពុងជ្រៀតចូលមកទីផ្សារកម្ពុជាផងដែរ។
នេះជាសញ្ញាមួយដែលអ្នកជំនាញផ្នែកស្រាវជ្រាវទីផ្សារបានព្រមាន ថា ផលិតករក្នុងស្រុកត្រូវពង្រឹងលទ្ធភាពប្រកួតប្រជែងរបស់ខ្លួនឲ្យ កាន់តែខ្លាំងនៅលើឧស្សាហកម្មនេះ។
នៅចុងសប្ដាហ៍នេះសាខាទី៦ របស់ហាងកាហ្វេ Brown Coffee និង Bakery ដែលជាយីហោហាងកាហ្វេក្នុងស្រុកមួយ នឹងត្រូវបង្កើតឡើងតាមមហាវិថី សុធារស កែងផ្លូវលេខ ២៦៦។
លោក ចាង ប៊ុនលាង ជាដៃគូគ្រប់គ្រងរបស់ហាង Brown Coffee និង Bakery បាននិយាយថា៖ «វាឆ្លុះបញ្ចាំងពីការវិនិយោគរយៈពេលវែងរបស់យើង។ ខណៈយើងកំពុងពង្រីកកាន់តែធំ យើងក៏ផ្ដោតលើគុណភាពនិងសេវាកម្មដ៏ល្អផងដែរ»។
យីហោក្នុងស្រុកជាច្រើនបាន ដំណើរការយ៉ាងល្អនៅទីផ្សារកម្ពុជា ដូចជា Park Cafe, Blue Pumpkin ឡាក់គី បឺហ្គឺ ប៊ីប៊ីវើល និង T&C Caffee។
លោក ចាន់ ស៊ី អ្នកគ្រប់គ្រងទូទៅរបស់ហាង Park Cafe និយាយថា តម្រូវការកំពុងកើនឡើង។ លោកបន្តថា៖ «ជោគជ័យរបស់យើងត្រូវបានទទួលស្គាល់ពីការកើនឡើងជាបន្ត បន្ទាប់របស់យើងពីមានហាងតែមួយរហូតដល់ហាង ៦»។
លោក Owen Williams អ្នកគ្រប់គ្រងក្រុមហ៊ុន CB Richard Ellis ដែលជាក្រុមហ៊ុនស្រាវជ្រាវទីផ្សារមួយបានឲ្យដឹងថា យីហោក្នុងស្រុកជាច្រើនខាងឧស្សាហកម្មអាហារ និងស្រាបៀរ បានដំណើរការបានយ៉ាងល្អ។ ប៉ុន្តែវាអាចមានការផ្លាស់ប្តូរនៅក្នុងរយៈពេលដ៏ខ្លីពេលដែល យីហោ Burger King បានចូលមកក្នុងទីផ្សារកាលពីពេលថ្មីៗនេះដែលបានចាប់ផ្តើមនៅ ក្នុងព្រលានយន្តហោះ។
លោកបន្តថា៖ «ទីផ្សារដើម្បីទិសដៅ ត្រឹមត្រូវគឺជាគន្លឹះដ៏សំខាន់សម្រាប់យីហោក្នុងស្រុក។ គូប្រកួតប្រជែងអន្តរជាតិមានបទពិសោធច្រើនជាង»។
យីហោល្បីៗកាន់តែច្រើនបានចូលមកទីផ្សារកម្ពុជា ដូចជាហាងកាហ្វេ Costa ហាងដុតនំ Tous Les Jours ជាដើម។
លោក ប៊ុនលាង ទទួលស្គាល់ការមកដល់របស់យីហោអន្តរជាតិមួយចំនួនមានន័យថាជា ការប្រកួតប្រជែងគ្នាយ៉ាងខ្លាំងនៅក្នុងឧស្សាហកម្មនេះ ប៉ុន្តែលោកនៅតែមើលឃើញឱកាសរីកចម្រើន។ លោកថ្លែងថា៖ «យើងបានត្រៀមខ្លួនជាស្រេចហើយសម្រាប់ហាងកាហ្វេ អន្តរជាតិ។ យើងផ្ដល់តម្លៃផលប្រយោជន៍នៃការប្រកួតប្រជែងនេះ ហើយយើងបានពង្រឹងធនធានមនុស្សយើងរួចហើយដែរ»៕
No comments:
Post a Comment