អង្គការចំនួន៤០៖ ដំណោះស្រាយផ្នែកនយោបាយ អាចដោះស្រាយជម្លោះបោះឆ្នោតបាន
VOD - ថ្ងៃសៅរ៍ ទី៧ ខែកញ្ញា ឆ្នាំ2013
អង្គការចំនួន៤០ នៅថ្ងៃសៅរ៍នេះ អំពាវនាវ ឲ្យថ្នាក់ដឹកនាំជាន់ខ្ពស់គណបក្សសង្គ្រោះជាតិ និងគណបក្សប្រជាជនកម្ពុជា ជួបគ្នាជាបន្ទាន់ ដើម្បីដោះស្រាយជម្លោះបោះឆ្នោត និងដើម្បីចៀសវាងការបង្កឲ្យមានភាពប្រទុស្តរាយក្នុងសង្គម។
សេចក្តីអំពាវនាវជាបន្ទាន់របស់បន្ទប់ ស្ថានការណ៍ថ្ងៃបោះឆ្នោត ធ្វើឡើងភ្លាមៗ បន្ទាប់ពីគណបក្សសង្គ្រោះជាតិ បានធ្វើមហាបាតុកម្ម នៅថ្ងៃទី០៧ខែកញ្ញានេះ ហើយការទាមទាររបស់ពួកគេឲ្យមានគណៈកម្មការចម្រុះត្រួតពិនិត្យ ភាពមិនប្រក្រតីនៃការបោះឆ្នោត និងការអំពាវ នាវឲ្យពន្យារពេលនៃការប្រកាសលទ្ធផលបោះឆ្នោត ត្រូវបានបដិសេធទាំងអស់។
បន្ទប់ស្ថានការណ៍ថ្ងៃបោះឆ្នោត
ដែលមានអង្គការ៤០ជាសមាជិក លើកឡើងក្នុសេចក្តីថ្លែងការណ៍ថា
ក្របខណ្ឌច្បាប់ ដែលបានអនុវត្តកន្លងមករបស់ស្ថាប័នគជប
និងក្រុមប្រឹក្សាធម្មនុញ្ញ
បរាជ័យក្នុងការស្វែងរកយុត្តិធម៌ជូនម្ចាស់ឆ្នោតឲ្យបានត្រឹមត្រូវ
និងស្ងប់ចិត្ត។ បន្ទប់ស្ថានការណ៍បញ្ជាក់ថា
មានតែការដោះស្រាយតាមផ្លូវនយោបាយទេ
ដែលអាចឈានទៅរកការដោះស្រាយភាពមិនប្រក្រតី និងជម្លោះនៃការបោះឆ្នោត។
សេចក្តីថ្លែងការណ៍លើកឡើងថា
គណបក្សសង្គ្រោះជាតិ
បានលើកជាសំណើផ្លូវការឲ្យមានជំនួបជាច្រើនលើកហើយ
ដូច្នេះគណបក្សប្រជាជនកម្ពុជា
គួរតែផ្តល់ចម្លើយជាវិជ្ជមាននៅពេលឆាប់ៗខាងមុខ។ សង្គមស៊ីវិល៤០នោះ
បារម្ភជាខ្លាំងថា ការបរាជ័យក្នុងការដោះ
ស្រាយជម្លោះបោះឆ្នោតតាមផ្លូវនយោបាយ
អាចបង្កឲ្យមានភាពប្រទុស្តសារាយក្នុងសង្គម វិបត្តិនយោបាយ
និងសេដ្ឋកិច្ចសង្គមធ្ងន់ធ្ងរ
ដែលធ្វើឲ្យប៉ះពាល់ដល់ជីវភាពរស់នៅសុខសាន្តរបស់ប្រជាពលរដ្ឋ។
ក្នុងពេលមហាបាតុកម្មនៅព្រឹកថ្ងៃ
សៅរ៍នេះ គណបក្សសង្គ្រោះជាតិ បានទាមទារឲ្យបង្កើតគណៈកម្មការចម្រុះ
ស៊ើបអង្កេតការបោះឆ្នោត តែរដ្ឋមន្ត្រីក្រសួងមហាផ្ទៃ លោក ស ខេង លើកឡើងថា
ការបង្កើតគណៈកម្មការចម្រុះ មិនគោរពច្បាប់។ គណបក្សសង្គ្រោះជាតិ
ព្រមានការធ្វើមហាបាតុកម្មបន្តបន្ទាប់ ប្រសិនបើគជប
មិនពន្យារការប្រកាសលទ្ធផលបោះឆ្នោតនៅថ្ងៃអាទិត្យស្អែកនេះ តែគជប
ចេញសេចក្តីជូនដំណឹងថា ខ្លួននឹងប្រកាសលទ្ធផលបោះឆ្នោត
នៅព្រឹកថ្ងៃអាទិត្យនេះ។
គណបក្សសង្គ្រោះជាតិ
ព្រមានធ្វើមហាបាតុកម្មជាបន្តបន្ទាប់
ប្រសិនបើមិនមានគណៈកម្មការចម្រុះ
និងការពន្យារពេលប្រកាសលទ្ធផលបោះឆ្នោត។
លោក ស ខេង នៅថ្ងៃសៅរ៍នេះ
អំពាវនាវឲ្យប្រជាពលរដ្ឋ និងអ្នកចូលរួមតវ៉ា រក្សាភាពស្ងៀមស្ងាត់
រង់ចាំការចរចារវាងគណបក្សសង្គ្រោះជាតិ និងគណបក្សប្រជាជនកម្ពុជា
ដែលចៀសមិនផុតទេ តែលោកមិនអាចបញ្ជាក់លម្អិតពីពេលវេលា
និងរបៀបវារៈនៃការចរចានេះទេ។
អនុប្រធានគណបក្សសង្គ្រោះជាតិ លោក កឹម សុខា ធ្លាប់ប្រាប់VODថា
គណបក្សប្រឆាំង ចង់ជួបជាមួយថ្នាក់ដឹកនាំកំពូល
ដែលអាចសម្រេចការងារបាន គឺជាមួយលោកស ខេង ឬក៏លោកនាយករដ្ឋមន្ត្រី
ហ៊ុន សែន។
គួរបញ្ជាក់ថា ក្រោយការបោះឆ្នោត
លោកនាយករដ្ឋមន្ត្រី ហ៊ុន សែន ធ្លាប់លើកឡើងថា លោកមានក្រុមការងារ
ដើម្បីចរចាជាមួយគណបក្សសង្គ្រោះជាតិ រកដំណោះស្រាយ
តែប្រសិនបើមានភាពជាប់គាំងមិនអាចដោះស្រាយបាន លោក
នឹងចេញមុខដោះស្រាយ៕
No comments:
Post a Comment