អន្តរាគមន៍យោធានៅស៊ីរី ៖
ទឹកផ្តាច់ព្រ័ត្ររបស់លោក អូបាម៉ា !
RFI Khmer ០៩ កញ្ញា ២០១៣
បទសម្ភាសន៏ជាមួយ អៀង សុខម៉ិញ
បទសម្ភាសន៏ជាមួយ អៀង សុខម៉ិញ
តើការបោះឆ្នោតនេះមានដំណើរការយ៉ាងដូចម្តេច ?
ចាស មែនហើយ ! ទាំងវិមានរដ្ឋាភិបាល សេតវិមាន ទាំងសមាជិកសភា ទាំងអ្នកសារព័ត៌មាន សុទ្ធតែកំពុងគុណគិត បូកលេខអត្ត តាមគ្រប់វិធីទាំងអស់ ប៉ុន្តែរហូតមកទល់នឹងម៉ោងនេះ គ្មាននរណាម្នាក់អាចមានសមត្ថភាពព្យាករណ៍បានថាតើសភាអាមេរិក នឹងបោះឆ្នោតគាំទ្រឬ ប្រឆាំង សំណើធ្វើប្រតិបត្តិការយោធានៅស៊ីរីនេះទេ។ នៅព្រឹទ្ធសភា គណៈកម្មការកិច្ចការបរទេសបានអនុម័តព្រមព្រៀងឱ្យមានការវាយប្រហារ យោធាលើរបបដឹកនាំក្រុងដាម៉ាសហើយ ប៉ុន្តែការបោះឆ្នោតសម្រេចដ៏សំខាន់នឹងប្រព្រឹត្តទៅពុធឯណោះទេ។ នៅព្រឹទ្ធសភានេះ គណបក្សប្រជាធិបតេយ្យរបស់លោកអូបាម៉ា មានសំឡេងច្រើន។ ចេញពីព្រឹទ្ធសភា ត្រូវឆ្លងសភាជាន់ទាបទៀត។ គឺនៅទីនោះហើយដែលអាចជួបការលំបាកខ្លាំងព្រោះ បក្សប្រជាធិបតេយ្យមានសំឡេងភាគតិច។ ប្រធានសភាដែលជាអ្នក សាធារណរដ្ឋ គាំទ្រសំណើរបស់លោកអូបាម៉ាមែន ប៉ុន្តែនេះជំហរបុគ្គលតែប៉ុណ្ណោះ។ មានសមាជិកបក្ស តិចតួចបំផុតដែលតាមលោក។ បើតាមសារព័ត៌មាន មានតែតំណាងតែ២៤នាក់ប៉ុណ្ណោះដែលចង់ឃើញអន្តរាគមន៍យោធា ខណៈដែល គេត្រូវការសំឡេងគាំទ្រដល់ទៅ ២១៧សំឡេងទើបគ្រប់គ្រាន់។
ហេតុដូច្នេះហើយបានជារដ្ឋាភិបាល និងរូបលោក អូបាម៉ា ផ្ទាល់កំពុងបើកយុទ្ធនាការយ៉ាងសកម្មនិងមមារញឹកបំផុត។ ទូរស័ព្ទទៅបញ្ចុះបញ្ចូលសមាជិកសភាផង ថ្លែងសារតាមកញ្ចក់ទូរទស្សន៍ផង។ លោកប្រធានាធិបតី ទំនងជាបានផ្តល់បទសម្ភាសន៍ ដល់ប៉ុស្តិ៍ទូរទស្សន៍ចំនួន៦ ថតទុកចាក់ផ្សាយនៅល្ងាចនេះ និងឡើងថ្លែងសុន្ទរកថានៅចំពោះមុខសភា ហើយនៅថ្ងៃអង្គារស្អែក លោកអូបាម៉ា នឹងថ្លែងសារទៅប្រជាជាតិអាមេរិកទាំងមូលតែម្តងបន្ថែមទៀត។ ជាមួយគ្នានេះ ឯកសារវីដេអូ បង្ហាញពីស្ថានភាពគ្រោះថ្នាក់ និងជនរងគ្រោះស៊ីរី ពីវាយប្រហារដោយអាវុធគីមី កាលពីថ្ងៃទី ២១សីហា ដែលជាបុព្វហេតុនាំឱ្យរដ្ឋបាលអូបាម៉ាចង់ធ្វើប្រតិបត្តិការយោធា ព្រមានរបបក្រុងដាម៉ាស ក៏ត្រូវចាក់ផ្សាយវិលទៅវិលមកពេញកញ្ចក់ទូរទស្សន៍អាមេរិក។ ប៉ុន្តែទន្ទឹមគ្នានោះ បទសម្ភាសន៍ជាមួយនឹងប្រធានាធិបតីស៊ីរី បាស្ហារ អាល់អាសាទ ដែលបដិសេធគ្មានជាប់ពាក់ព័ន្ធនឹងការប្រើប្រាស់អាវុធគីមី ក៏នឹងត្រូវចាក់ផ្សាយទាំងស្រុងតាមកញ្ចក់ទូរទស្សន៍អាមេរិកដែរ។
ចុះប្រសិនបើ សភាអាមេរិក បោះឆ្នោតប្រឆាំងនឹងប្រតិបត្តិការយោធានៅស៊ីរីមែន ?!
ទេ ! មិនប្រាកដទេ ! ប៉ុន្តែនេះ ជាសេណារីយោ ដ៏អាក្រក់បំផុត ដែលលោកអូបាម៉ា ចង់បញ្ចៀសឱ្យបាន នៅក្នុងល្បែងនយោបាយដ៏គ្រោះថ្នាក់លើកនេះ។ ដូចរចនា ដឹងស្រាប់រួចមកហើយ ថាតាមការពិតទៅនោះ ប្រធានាធិបតីអាមេរិកមានសិទ្ធិ មានអំណាចសម្រេច តែម្នាក់ឯងចេញធ្វើប្រតិបត្តិការយោធានៅបរទេស ដោយមិនបាច់សួរយោបល់ពីសភាទេ ដូចដែលប្រធានាធិបតីអាមេរិកមុនៗ មានជាអាទិ៍លោក George Bush សម្រេចធ្វើសង្គ្រាមនៅអ៊ីរ៉ាក់ជាដើម ប៉ុន្តែលោកអូបាម៉ា ចង់លេងល្បែងជាប្រធានាធិបតីផង និងទំនុកចិត្តផង ទើបស្នើសុំការឯកភាពពីសភា។ បើសភាយល់ព្រម នោះអន្តរាគមន៍យោធាអាមេរិកកាន់តែមានឥទ្ធិពល ត្រូវដឹងត្រូវដងតាំងរដ្ឋាភិបាល ទាំងសភា ទាំងប្រជាជន។ ប៉ុន្តែបើសភាថា “ទេ” នោះលោកអូបាម៉ា ពិតជាជួបការលំបាកខ្លាំង ព្រោះបើនៅតែចចេសធ្វើសង្គ្រាម នោះនឹងត្រូវប្រឆាំងនឹងឆន្ទៈប្រជាជាតិ តែបើមិនធ្វើគឺដូចជាលេបសំដីខ្លួនឯង ព្រោះលោកបានធ្លាប់ព្រមានដាក់ទណ្ឌកម្មចាស់ដៃលើរបបណាដែលហ៊ាន កន្លងបន្ទាត់ក្រហមហាមឃាត់ ពោលគឺការប្រើប្រាស់អាវុធគីមីប្រល័យជីវិតមនុស្សនេះឯង។
ប្រតិកម្មរបស់សហគមន៍អន្តរជាតិ
នៅប្រទេសអង់គ្លេស ក្រោយពីសភាបោះឆ្នោតប្រឆាំង រដ្ឋាភិបាលក្រុងឡុងដ៍ បានបោះបង់ចោលគំនិតចង់ធ្វើអន្តរាគមន៍នៅស៊ីរី ប៉ុន្តែរដ្ឋាភិបាលនេះ គាំទ្រជានិច្ចនយោបាយការទូតរបស់អាមេរិក។ ចំណែកប្រទេសបារាំងវិញ លោកប្រធានាធិបតី ហ្វ្រង់ស័រ ហូឡង់ បានរង់ចាំសេចក្តីសម្រេចរបស់សភាអាមេរិក និងរបាយការណ៍របស់អង្គការសហប្រជាជាតិ ស្តីពីការប្រើប្រាស់អាវុធគីមី នៅស៊ិរីសិន ទើបផ្តល់សេចក្តីសម្រេចចិត្តតាមក្រោយ។ សូមបញ្ជាក់ថា ដំបូងឡើយ គឺបារាំងនិងអាមេរិក ដែលមានគំនិតផ្តួចផ្តើមនិយាយអំពីអន្តរាគមន៍យោធានៅស៊ីរីមុនគេ។ ចំណែកចិននិងរុស្ស៊ី គ្មានអ្វីប្លែក ដូចជាលើកមុនៗ តែងតែប្រឆាំងដាច់ខាតនឹងការវាយប្រហារយោធា។ ចិនបានសើ្នឱ្យអាមេរិក មានការប្រុងប្រយ័ត្ន ហើយយកល្អ គួរតែវិលទៅកាន់តុអង្គការសហប្រជាជាតិពិភាក្សាគ្នា។ សម្រាប់ប្រមុខការទូតរុស្ស៊ី ប្រតិបត្តិការយោធា បានត្រឹមនាំដល់ការផ្ទុះឡើងខ្លាំងនៃសកម្មភាពភេរវនិយម ហើយមិនទាន់ជ្រុលពេលទេដែលត្រូវវិលមកដោះស្រាយវិបត្តិតាមផ្លូវ នយោបាយ។
ខណៈដែលសភាអាមេរិកហៀបនឹងសម្រេចចិត្តធ្វើអន្តរាគមន៍យោធា ស្រាប់តែពាក្យថាដំណោះស្រាយដោយសន្តិវិធី តាមផ្លូវនយោបាយបាន ធ្លាយចេញយ៉ាងផុសផុល។ របបក្រុងដាម៉ាសបានប្រកាសយល់ព្រមវិលទៅកាន់តុចរចា ដោយឥតលក្ខខណ្ឌទៀតផង៕
No comments:
Post a Comment