កម្ពុជាមានកំណើនសេដ្ឋកិច្ចប្រមាណ៧,៦ភាគរយក្នុងឆ្នាំ២០១៣នេះ
សេដ្ឋកិច្ចរបស់ប្រទេសកម្ពុជានៅឆ្នាំ២០១៣នេះ មានកំណើនរហូតទៅដល់៧,៦ភាគរយ ដែលវាលើសពីការព្យាករណ៍ទុក។ នេះបើតាមការអះអាងរបស់ឯកឧត្តម ជា ចាន់តូ ទេសាភិបាលធនាគារជាតិ នៃកម្ពុជា។
បើតាមឯកឧត្តម ជា ចាន់តូ ការកើនឡើងនៃកំណើនសេដ្ឋកិច្ចកម្ពុជានេះ គឺដោយសារសន្ទុះកើនឡើងនៃចំណូលទាក់ទងនឹងវិស័យទេសចរណ៍ កសិកម្ម ការនាំចេញ និងវិស័យអចលនទ្រព្យ សំណង់ជាដើម។ ហើយក្នុងនោះក៏គួបផ្សំនឹងការអនុវត្តគោលនយោបាយបានត្រឹមត្រូវ របស់រាជរដ្ឋាភិបាល សម្រាប់វិស័យផលិតកម្ម ពិសេសវិស័យកសិកម្ម និងទីផ្សារនាំចេញ ដែលវាជាចលករសំខាន់ជម្រុញកំណើនសេដ្ឋកិច្ចប្រទេសកម្ពុជានេះ។
សូមរំលឹកថា បើយោងតាមការព្យាករណ៍របស់ធនាគារពិភពលោក (WB) កាលពីដើមឆ្នាំនេះ កំណើនសេដ្ឋកិច្ចរបស់ប្រទេសកម្ពុជាសម្រាប់ឆ្នាំ២០១៣ គឺមានត្រឹមប្រមាណ៦,៧ភាគរយ ប្រហាក់ប្រហែលនឹងឆ្នាំ២០១២ដែរ ខណៈដែលក្រសួងសេដ្ឋកិច្ចកម្ពុជាព្យាករណ៍ថា មានកំណើន៧ភាគរយនោះ៕
No comments:
Post a Comment