ការនាំចេញដំឡូងមីធ្លាក់ចុះ៥៥%
ភ្នំពេញប៉ុស្តិ៍ ០៣-០៩-២០១៣
ការនាំចេញដំឡូងមីរបស់កម្ពុជានៅរដូវ ប្រមូលផលឆ្នាំនេះមានការធ្លាក់ចុះយ៉ាងខ្លាំង ធៀបនឹងឆ្នាំមុន ដោយសារថៃដែលជាទីផ្សារដំឡូងមីដ៏សំខាន់មួយរបស់កម្ពុជាបាន រឹតត្បិតការនាំចូលកសិផលពីប្រទេសជិតខាង ដើម្បីជួយលើកកម្ពស់ជីវភាពប្រជាកសិករខ្លួន។
យោងតាមទិន្នន័យរបស់ក្រសួងពាណិជ្ជកម្មកម្ពុជា ក្នុងឆមាសទីមួយឆ្នាំនេះកម្ពុជាបាននាំចេញដំឡូងមីស្រស់ និងស្ងួតសរុប ២៨៨ ១០៩ តោន ពោលគឺធ្លាក់ចុះប្រមាណ៥៥ ភាគរយ បើប្រៀបធៀបទៅរយៈពេលដូចគ្នាកាលពីឆ្នាំមុនដែលមាន ចំនួនសរុប ៦៣៤ ៣១៧ តោន។ ចំនួនទឹកប្រាក់ក្នុងការនាំចេញមានសរុប ១៥ លានដុល្លារ។
មន្រ្តីផ្នែកកសិកម្មតាមបណ្តាខេត្តជាប់ព្រំដែនថៃបានលើកឡើង ថា នៅដើមឆ្នាំនេះ ថៃបានរឹតបន្តឹងការនាំចូលកសិផលពីកម្ពុជាក្នុងនោះ រួមមានដំឡូងមីផងដែរដែលជាហេតុចម្បងធ្វើឲ្យការនាំចេញដំឡូង មីមានការថយចុះ។
លោក ឡុង ថន អនុប្រធានមន្ទីរកសិកម្មខេត្តបាត់ដំបង បានប្រាប់ភ្នំពេញ ប៉ុស្តិ៍ កាលពីម្សិលមិញថា ប្រទេសថៃបានដាក់ចេញនូវគោលនយោបាយថ្មីនៅដើមឆ្នាំនេះ ក្នុងការហាមឃាត់ការនាំចូលកសិផលពីកម្ពុជា ដែលធ្វើឲ្យទីផ្សារដំឡូងមីរបស់កម្ពុជារួមតូច។ ការលក់ចេញខ្លះអាចធ្វើទៅបាននៅពេលដែលកសិករថៃមិនអាចមានដំឡូង មីគ្រប់គ្រាន់ដើម្បីផ្គត់ផ្គង់ឲ្យឈ្មួញប៉ុណ្ណោះ។
លោកបញ្ជាក់ថា កម្ពុជា និង ថៃមានច្រកព្រំដែនសំខាន់ៗបួនដើម្បីដឹកជញ្ជូន និងដោះដូរទំនិញ ហើយកាលពីដើមឆ្នាំ២០១២ ថៃបាននាំចូលដំឡូងមីពីកម្ពុជាប្រមាណ ៣០ ឡានក្នុងមួយថ្ងៃៗតាមច្រកព្រំដែនមួយ។ តែនៅដើមឆ្នាំនេះ ថៃបាននាំចូលតែត្រឹម ១០ ឡានប៉ុណ្ណោះក្នុងមួយថ្ងៃតាមច្រកនីមួយៗ។
លោកអះអាងថា៖ «គោលនយោបាយថ្មីរបស់ថៃបានហាមឃាត់ការនាំចូលដំឡូងពីកម្ពុជា នាដើមឆ្នាំនេះ ដូច្នេះឈ្មួញថៃមកទិញរបស់យើងនៅពេលណាដែលការផ្គត់ផ្គង់នៅ ថៃមានការខ្វះខាតតែប៉ុណ្ណោះ»។
តម្លៃដំឡូងស្រស់នៅខេត្តបាត់ដំបងមានចន្លោះពី ២៥០ រៀល ដល់ ៣០០ រៀល ក្នុងមួយគីឡូក្រាម ហើយតម្លៃដំឡូងស្ងួតមានពី ៥០០ រៀល ទៅ ៦០០ រៀល ក្នុងមួយគីឡូក្រាម។ ជាទូទៅតម្លៃដំឡូងមី និង តម្រូវការនៅលើទីផ្សារមានការខុសគ្នាពីខេត្តមួយទៅខេត្តមួយ ឬ ពីស្រុកមួយទៅស្រុកមួយទៀត អាស្រ័យតាមតម្រូវការជាក់ស្តែងនៅតាមតំបន់នោះ។
លោក គឹម សារឿន ប្រធានមន្ទីរកសិកម្មនៅខេត្តកំពង់ចាមបានឲ្យដឹងថា ដំឡូងស្រស់ និងដំឡូងស្ងួតនៅខេត្តកំពង់ចាម ហាក់មិនមានការប្រែប្រួលខ្លាំងឡើយបើប្រៀបធៀបនឹងឆ្នាំមុន។ លោកបន្តថា ដំឡូងមីនៅខេត្តកំពង់ចាមត្រូវបាននាំចេញភាគច្រើនទៅប្រទេស វៀតណាមហើយទីផ្សារទីនោះគឺនៅតែមានស្ថិរភាពក្នុងឆ្នាំនេះ។
ប្រទេស ថៃ គឺជាទីផ្សារសំខាន់មួយសម្រាប់ដំឡូងមី កម្ពុជា ក្នុងចំណោមទីផ្សារសំខាន់ពីរទៀតគឺ វៀតណាម និងចិន។
តាមទិន្នន័យនាំចេញរបស់ក្រសួងកសិកម្ម សន្ទុះនៃការនាំចេញដំឡូងមីមានភាគច្រើននៅដើមឆ្នាំ។
ក្នុងកិច្ចប្រជុំលើកទី ៤ ស្តីពីកិច្ចសហការពាណិជ្ជកម្មរវាងកម្ពុជា និង ថៃ ដែលបានធ្វើឡើងនៅភ្នំពេញកាលពីថ្ងៃទី ២២ ខែមេសា ប្រទេសថៃបានយល់ព្រមកាត់បន្ថយបែបបទរដ្ឋបាលជាច្រើនក្នុង ការនាំចូល ពោត និង ដំឡូងមី ពីកម្ពុជាដើម្បីឲ្យដំណើរការនាំចេញផលិតផលនេះកាន់តែងាយស្រួល ជាងមុន។
លោក ស្រី ចន្ធី អ្នកវិភាគកសិកម្មឯករាជ្យបានឲ្យដឹងថា ដើម្បីកាត់បន្ថយភាពងាយរងគ្រោះរបស់កសិករក្នុងការប្រកបអាជីវ កម្មលើវិស័យកសិកម្ម កសិករគួរចងក្រងគ្នាជាក្រុម ឬបង្កើតសមាគមអ្នកដាំដុះដំឡូងមីជាដើម ដើម្បីងាយស្រួលទទួលបានព័ត៌មានទីផ្សារ និង ពង្រឹងអំណាចក្នុងការតថ្លៃលក់ផលិតផលរបស់ខ្លួន។
លើសពីនេះការជំរុញ ឲ្យមានការបង្កើតរោងចក្រកែច្នៃក្នុងស្រុកឲ្យបានកាន់តែ ច្រើន ដើម្បីពង្រីកទីផ្សាររបស់កសិករ។
លោកបានបន្តថា៖ «ប្រសិនបើយើងមិនមានរោងចក្រកែច្នៃក្នុងស្រុកគ្រប់គ្រាន់ កសិករនៅតែប្រឈមជាមួយនឹងហានិភ័យខ្ពស់ និងមានភាពមិនច្បាស់លាស់ក្នុងការប្រកបរបររបស់ខ្លួន។ រោងចក្រក្នុងស្រុកអាចជួយកាត់បន្ថយការពឹងផ្អែកលើទីផ្សារ ពីបរទេស ហើយអាចផ្ដល់ទីផ្សារកាន់តែទូលាយដល់កសិករ និងបង្កើនអំណាចក្នុងការចរចាលក់ផលិតផល»៕
No comments:
Post a Comment