ក្រុមហ៊ុន ហ្វីលីពីន អ៊ែរឡាញ គ្រោងនឹងធ្វើការហោះហើរមកកាន់កម្ពុជា
ភ្នំពេញប៉ុស្តិ៍ ១៨ កញ្ញា ២០១៣
ភ្នំពេញៈ ក្រុមហ៊ុន ហ្វីលីពីន អ៊ែរឡាញ គ្រោងនឹងដំណើរការជើងហោះហើររវាងប្រទេស ហ្វីលីពីន និង កម្ពុជា ដែលត្រូវបានគេមើលឃើញថា ជាការបំបែកភាពផ្ដាច់មុខរបស់ក្រុមហ៊ុនជាគូប្រកួតប្រជែងក្នុង ស្រុក Cebu Pacific Air ដែលបានចាប់ផ្ដើមកាលពីខែ មេសា ឆ្នាំមុន។
លោក វណ្ណ ចន្ធី ប្រធាននាយកដ្ឋានដឹកជញ្ជូនផ្លូវអាកាសនៃរដ្ឋលេខាធិការអាកាសចរស៊ីវិល កម្ពុជា បានឲ្យដឹងថា អាជ្ញាធរបានទទួលលិខិតពីសមភាគីហ្វីលីពីនរបស់ខ្លួនដែលបញ្ជាក់ថា ក្រុមហ៊ុននេះគ្រោងនឹងហោះហើរមកប្រទេស កម្ពុជា។ លោកបន្ថែមថា ពួកគេមិនមានព័ត៌មានលម្អិតនៅឡើយទេអំពីថាតើនឹងហោះហើរផ្ទាល់ ជាមួយខេត្ត សៀមរាប ឬ ក៏ទីក្រុង ភ្នំពេញនោះទេ។
ក្រុមហ៊ុន ហ្វីលីពីន អ៊ែរឡាញ បានកាន់កាប់ភាគហ៊ុន ៤៩ ភាគរយនៅក្នុងក្រុមហ៊ុន កម្ពុជា អ៊ែរឡាញ ដែលបានបង្កើតឡើងថ្មី។ ក្រុមហ៊ុន កម្ពុជា អ៊ែរឡាញ គ្រោងនឹងហោះហើរទៅប្រទេស ហ្វីលីពីនផងដែរ។ លោកបន្តថា៖ «ពួកគេមានបញ្ហាផ្សេងគ្នា។ ក្រុមហ៊ុនអាកាសចរណ៍ កម្ពុជា អ៊ែរឡាញ ហោះហើរទៅប្រទេស ហ្វីលីពីន គឺចេញពីភាគីកម្ពុជា។ ក្រុមហ៊ុន ហ្វីលីពីន អ៊ែរឡាញ ទោះបីជាពួកគេជាភាគហ៊ុនិកក្រុមហ៊ុន កម្ពុជា អ៊ែរឡាញ ក៏ដោយ ប៉ុន្តែវាត្រូវបានរៀបចំឡើងដោយអាជ្ញាធរអាកាសចរណ៍ស៊ីវិល របស់ ហ្វីលីពីន»។
លោក Mark Hanna ប្រធានផ្នែកហិរញ្ញវត្ថុក្រុមហ៊ុន រ៉ូយ៉ាល់ គ្រុប ដែលគ្រប់គ្រងភាគហ៊ុន ៥១ ភាគរយរបស់ក្រុមហ៊ុន កម្ពុជាអ៊ែរឡាញ និយាយកាលពីម្សិលមិញថា លោកមិនបានទទួលដំណឹងអ្វីទាំងអស់អំពីផែនការរបស់ក្រុមហ៊ុន ហ្វីលីពីន អ៊ែរឡាញ ហើយថាលោកត្រូវតែពិនិត្យឲ្យបានច្បាស់ពីព័ត៌មាននេះជាមុនសិនមុន នឹងធ្វើការអត្ថាធិប្បាយបានតែលោកបានបន្តថា ក្រុមហ៊ុន អាកាសចរណ៍ កម្ពុជា អ៊ែរឡាញ គ្រោងនឹងដំណើរការជើងហោះហើរឆ្ពោះទៅប្រទេស ហ្វីលីពីន ក្នុងរង្វង់ពីរខែក្រោយនេះ។
ស្ថិតិ របស់ក្រសួង ទេសចរណ៍បង្ហាញថា ភ្ញៀវទេសចរ ហ្វីលីពីន ចំនួន ៩៧ ៤៨៧ នាក់បានមកទស្សនាប្រទេសកម្ពុជាកាលពីឆ្នាំមុន កើនឡើង ៣៧,០ ភាគរយធៀបនឹងចំនួន ៧០ ៧១៨ នាក់កាលពីឆ្នាំ ២០១១។
លោក ចន្ធី ឲ្យដឹងថា ក្រុមហ៊ុនអាកាសចរណ៍ ចិន (Air China) កំពុងដាក់ពាក្យសុំការអនុញ្ញាតការចុះចតដើម្បីហោះហើរពីទីក្រុង ប៉េកាំង ឆ្ពោះមកភ្នំពេញ និង សៀមរាប ផងដែរ៕
No comments:
Post a Comment