មន្ដ្រីការទូតកំពូលស៊ីរី ទៅទស្សនកិច្ចនៅរុស្សី
លោករដ្ឋមន្ដ្រីក្រសួងការបរទេសស៊ីរី Walid
RFI Khmer September 9, 2013
ជំនួបរវាងមន្ដ្រីការទូតប្រទេសទាំងពីរនេះ ធ្វើឡើងបន្ទាប់ពីបស្ចិមប្រទេសមួយចំនួន គម្រាមថា នឹងវាយប្រហាររបបលោកបាស្ហា អាល់ អាសាដ ក្នុងហេតុផលថា របបដឹកនាំលោកបាស្ហា អាល់ អាសាដ បានប្រើប្រាស់អាវុធគីមី សម្លាប់ជនស៊ីវិលស៊ីរីរាប់ពាន់នាក់។
អ្នកនាំពាក្យក្រសួងការបរទេសរុស្សីឲ្យដឹងត្រួសៗថា លោករដ្ឋមន្ដ្រីការបរទេសទាំងពីរ នឹងពិភាក្សាគ្នាជុំវិញស្ថានការណ៍នៅប្រទេសស៊ីរីនៅពេលបច្ចុប្បន្ន និងបញ្ហាប្រឈមនានា។ នៅក្រោយជំនួប សន្និសីទកាសែតមួយអាចនឹងធ្វើឡើងដែរ។ នេះបើតាមការឲ្យដឹងពីអ្នកនាំពាក្យដដែល។
ប្រទេសរុស្សី មានជំហរប្រឆាំងដាច់ខាតទៅនឹងអន្ដរាគមន៍យោធាទៅលើប្រទេសស៊ីរី ដែលដឹកនាំដោយអាមេរិក ដោយថាអន្ដរាគមន៍យោធានេះ នឹងធ្វើឲ្យភ្លើងសង្គ្រាមឆាបឆេះតំបន់ដើមបូព៌ាទាំងមូល។ ទីក្រុងមូស្គូ មិនត្រឹមតែបានសន្យាថានឹងជួយស៊ីរីទេ តែថែមទាំងបានជួយការពារស៊ីរី ដោយថា ស៊ីរីមិនមែនជាអ្នកប្រើអាវុធគីមី វាយប្រហារប្រជាជនខ្លួនឯងនោះទេ។
គួររំលឹកដែរថា ទំនាក់ទំនងដ៏ជិតស្និតរវាងរុស្សីនិងរបបទីក្រុងដាម៉ាស ចាប់ផ្ដើមតាំងពីជំនាន់ដែលរុស្សីនៅជាសហភាពសូវៀតនៅឡើយ។ កាលណោះ ប្រធានាធិបតីស៊ីរី លោកហាហ្វេ អាល់ អាសាដ ដែលត្រូវជាឪពុកលោកបាស្ហា អាល់ អាសាដ បានជួយគាំទ្រផ្នែកយោធាយ៉ាងពេញទំហឹងដល់សហភាពសូវៀត នៅក្នុងវិបត្តិនៅតំបន់ព្រែកជីកស៊ុយអេ ឆ្នាំ១៩៥៦៕
No comments:
Post a Comment