តម្រូវការអាផាតមិន
កំណើនតិច
ភ្នំពេញ ១២ កញ្ញា ២០១២
បឹងកេងកង១ ជាតំបន់ដែលប្រជុំទៅដោយអាផាតមិនយ៉ាងច្រើន
សម្រាប់តម្រូវការរបស់អតិថិជន។
រូបថត ហ៊ឹន ពិសី
ភ្នំពេញៈ ដោយសារលំហូរចូលនៃអ្នកវិនិយោគ និងជនបរទេស ដែលមកធ្វើការនៅប្រទេសកម្ពុជាកាន់តែច្រើននោះ បានធ្វើឲ្យតម្រូវការអាផាតមិនស្នាក់នៅបន្តកើនឡើងនៅក្នុងរយៈពេល
៧ ខែដើមឆ្នាំ ២០១៣នេះ។
លោក ច្រឹក សុខនីម
អគ្គនាយករងក្រុមហ៊ុន VTrust
Property បានប្រាប់ថា តម្រូវការអាផាតមិនជួលក្នុងរយៈពេល ៧ ខែដើមឆ្នាំ ២០១៣ នេះមានកំណើនប្រហែល ១០ ភាគរយ បើប្រៀបធៀបទៅនឹងរយៈពេលដូចគ្នាកាលពីឆ្នាំមុន ដោយក្នុងនោះមានភ្ញៀវប្រហែល ៨០ ភាគរយមកពីទ្វីប អាស៊ី
និង ទ្វីប អឺរ៉ុប។
លោកប្រាប់ទៀតថា
ទោះបីយ៉ាងណាតម្លៃជួលអាផាតមិន
មិនបានកើនឡើងនោះទេ ពីព្រោះការផ្គត់ផ្គង់កំពុងលើសចំណែកទីផ្សារប្រមាណ ៣៥
ភាគរយ។
លោកបានបញ្ជាក់ថា៖ «ការផ្គត់ផ្គង់អាផាតមិនមានច្រើននាពេលនេះ ដោយសារអ្នកវិនិយោគរំពឹងថា ពេលកម្ពុជាធ្វើសមាហរណកម្មសេដ្ឋកិច្ចជាមួយបណ្តាប្រទេសក្នុង តំបន់អាស៊ាននាចុងឆ្នាំ ២០១៥ តម្រូវការអាផាតមិន នឹងកើនឡើងច្រើនជាមិនខាន»។
បច្ចុប្បន្ននេះអាផាតមិន លំដាប់ A មានតម្លៃជួលចាប់ពី ១៣០០ ដុល្លារឡើងទៅ ខណៈអាផាតមិន លំដាប់ B មានតម្លៃជួលចន្លោះពី ៦០០ ទៅ ១២០០ ដុល្លារ និងអាផាតមិន លំដាប់ C
មានតម្លៃក្រោម ៦០០
ដុល្លារក្នុងមួយខែ
ដោយអាស្រ័យលើទំហំផ្ទះ និងចំនួនបន្ទប់ក្នុងផ្ទះនីមួយៗ។
យោងតាមការធ្វើអង្កេតថ្មីៗ ក្នុងចំណោមប្រធានប្រតិបត្តិពាណិជ្ជកម្មអាមេរិក ចំនួន ៤៧៥ នាក់នៅទូទាំងតំបន់បង្ហាញថា កម្ពុជាជាប្រទេសមួយដែលភាពទាក់ទាញបំផុតសម្រាប់ជនបរទេសដែល ធ្វើការឲ្យក្រុមហ៊ុនអាមេរិកនៅតំបន់អាស៊ាន។ ក្នុងចំណោមការអង្កេតទាំងនោះនៅកម្ពុជា ៦៥
ភាគរយរាយការណ៍ថា
បុគ្គលិកនៅតាមតំបន់ផ្សេងៗបានស្នើសុំប្តូរមកធ្វើការនៅកម្ពុជា ខណៈ សិង្ហបុរី មាន ៧១ ភាគរយ។
លោក ឌឹត ចណ្ណា
ប្រធានគ្រប់គ្រងទូទៅក្រុមហ៊ុនអចលនទ្រព្យ វីអឹមស៊ី បាននិយាយថា តម្រូវការអាផាតមិនពិតជាកើនឡើងដោយក្នុងរយៈពេល
៧ ខែដើមឆ្នាំ ២០១៣ នេះមានកំណើនចន្លោះពី ១៥ ទៅ ២០ ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំ ២០១២។
លោកបានបន្តថា
ដោយសារមានការប្រកួតប្រជែងច្រើន និងការផ្គត់ផ្គង់លើសតម្រូវការបានធ្វើឲ្យតម្លៃជួលអាផាតមិន ស្ថិតនៅទ្រឹងក្នុងឆ្នាំនេះបើធៀបទៅនឹងឆ្នាំមុន។
លោកថ្លែងថា៖ «ភ្ញៀវដែលស្នាក់នៅអាផាតមិន ក្នុងឆ្នាំនេះមានភាពខុសប្លែកពីបណ្តាឆ្នាំមុនៗដោយខ្ញុំសង្កេត ឃើញថា អ្នកមកស្នាក់នៅអាផាតមិនភាគច្រើនគឺជាអ្នកជំនួញ រីឯអ្នកធ្វើការងារមិនសូវមានច្រើននោះទេក្នុងឆ្នាំនេះ»។
លោក ប៉ូ អ៊ាវគង់
ប្រធានគ្រប់គ្រងទូទៅក្រុមហ៊ុន អេស៊ា រៀលអេស្ទេត បាននិយាយថា ចំនួនអាផាតមិន ដែលផ្គត់ផ្គង់នៅក្នុងទីផ្សារនឹងមានចំណែកលើសតម្រូវការកាន់តែ ច្រើននៅក្នុងរយៈពេល ១-២ ឆ្នាំខាងមុខ។
លោកបានប្រាប់ទៀតថា
ឆ្នាំនេះកំណើននៃការជួលអាផាតមិន
មានចំនួនប្រហែល ១៥ ភាគរយ
បើប្រៀបធៀបនឹងរយៈពេលដូចគ្នាកាលពីឆ្នាំ
២០១២កន្លងមក។
លោក គង់ វណ្ណសុភី
នាយកចាត់ការទូទៅនៃក្រុមហ៊ុន CPPI
ដែលគ្រប់គ្រងអាផាតមិន ចំនួន ៦
កន្លែងនៅក្នុងរាជធានីភ្នំពេញ
បាននិយាយថា
ឆ្នាំនេះតម្រូវការភ្ញៀវស្នាក់នៅអាផាតមិន ដែលគ្រប់គ្រងដោយក្រុមហ៊ុន CPPI
កំពុងកើនឡើងដោយអាផាមិននីមួយៗមានអត្រាប្រើប្រាស់ចន្លោះពី
៨០ ទៅ ៩០ ភាគរយ ខណៈខុនដូ Palm
Place ដែលស្ថិតនៅក្នុងសង្កាត់ បឹងកេងកង ១ មានភ្ញៀវស្នាក់នៅពេញៗជាប្រចាំ។
លោកបានបន្តថា ដោយមើលឃើញតម្រូវការអាផាតមិនកាន់តែច្រើននោះនៅពេលឆាប់ខាងមុខ ក្រុមហ៊ុន CPPI
នឹងដាក់ឲ្យដំណើរការអាផាតមិនចំនួន ២
កន្លែងផ្សេងទៀត។
លោកបញ្ជាក់ថា៖ «កំណើនភ្ញៀវមកជួលអាផាតមិនរបស់ក្រុមហ៊ុនខ្ញុំមានកំណើនចន្លោះពី
៥ ទៅ ១០ ភាគរយ ហើយភ្ញៀវភាគច្រើនគឺជាជនបរទេស
ដែលមកពីតំបន់អាស៊ី និង
អឺរ៉ុប»៕
No comments:
Post a Comment