សមាគមគ្រូជំរុញក្រសួងបង្កើតគណៈកម្មការស៊ើបអង្កេតភាពមិនប្រក្រតីប្រឡងបាក់ឌុប
ភ្នំពេញប៉ុស្តិ៍ ០៤-០៩-២០១៣
សមាគមគ្រូបង្រៀនកម្ពុជាឯករាជ្យ ជំរុញឲ្យក្រសួងអប់រំ យុវជន និងកីឡា បង្កើតគណៈកម្មការស៊ើបអង្កេតចំពោះករណីបែកធ្លាយវិញ្ញាសា និងការកើតមានអំពើពុករលួយក្នុងថ្ងៃប្រឡងសញ្ញាបត្រមធ្យមសិក្សា ទុតិយភូមិ ដែលបានប្រព្រឹត្តទៅកាលពីពេលថ្មីៗ។
លិខិតរបស់សមាគមគ្រូបង្រៀនកម្ពុជាឯករាជ្យ នៅថ្ងៃទី៣ ខែកញ្ញា បានផ្ញើជូនក្រសួងអប់រំ យុវជន និងកីឡា ដោយបង្ហាញថា ការប្រឡងរយៈពេល ២ថ្ងៃកន្លះ មានភាពមិនប្រក្រតី ៧ករណីបានកើតឡើង។ ក្រុមបច្ចេកទេសរបស់សមាគមគ្រូបង្រៀនបានសិក្សា និងវិភាគទៅលើឯកសារភស្តុតាងមួយចំនួន រកឃើញថា វិញ្ញាសាគណិតវិទ្យា វិញ្ញាសាអក្សរសាស្ត្រខ្មែរ វិញ្ញាសារូបវិទ្យា វិញ្ញាសាគីមីវិទ្យា និងវិញ្ញាសាជីវវិទ្យា បានបែកធ្លាយ។
លិខិតដដែលបានសរសេរថា មានករណីអំពើពុករលួយ ២ទៀត គឺនៅមណ្ឌលប្រឡងវិទ្យាល័យមេមត់ ខេត្តកំពង់ចាម ប្រធាន និងអនុប្រធានសហការជាមួយគ្រូឯកទេស ធ្វើអត្រាកំណែលក់តាមថ្នាក់ក្នុងតម្លៃ ៤០ម៉ឺនរៀល។ ប្រធាន អនុប្រធានមណ្ឌលប្រឡងវិទ្យាល័យរវៀង ស្រុករវៀង ខេត្តព្រះវិហារ តម្រូវឲ្យបេក្ខជនប្រមូលលុយក្នុងមួយថ្នាក់ ១លានរៀល។
ទាក់ទងបញ្ហានេះ ប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន មានប្រសាសន៍នៅថ្ងៃទី៣ ខែកញ្ញា ថា ក្រសួងអប់រំត្រូវតែបង្កើតគណៈកម្មការស៊ើបអង្កេត ដោយមានការចូលរួមពីសមាគម អង្គការសង្គមស៊ីវិលពាក់ព័ន្ធការងារអប់រំ ដើម្បីរកជនដែលបានលួចបញ្ចេញវិញ្ញាសាមកក្រៅ និងជនប្រព្រឹត្តិអំពើពុករលួយយកមកផ្ដន្ទាទោសតាមច្បាប់។
វិទ្យុអាស៊ីសេរី មិនអាចទាក់ទងប្រធាននាយកដ្ឋានមធ្យមសិក្សានៃក្រសួងអប់រំ យុវជន និងកីឡា លោក អ៊ឹង ង៉ោហុក ដើម្បីបកស្រាយជុំវិញបញ្ហានេះបានទេ នៅថ្ងៃទី៣ កញ្ញា ដោយលោកមិនទទួលទូរស័ព្ទ។
ការសិក្សាស្រាវជ្រាវមួយរបស់អង្គការកម្មវិធីអភិវឌ្ឍន៍ធនធានយុវជន (YRDP = វ៉ាយ.អ.ឌី.ភី) កាលពីសប្ដាហ៍មុន បានបង្ហាញអោយឃើញថា បេក្ខជនប្រឡងបាក់ឌុបនៅភ្នំពេញ បានចំណាយជាមធ្យមម្នាក់ ៣៧ដុល្លារអាមេរិក ដើម្បីសូកអនុរក្សក្នុងរយៈពេលប្រឡងចំនួន ២ថ្ងៃកន្លះ ពីថ្ងៃទី៥ ដល់ព្រឹកថ្ងៃទី៧ សីហា ឆ្នាំ២០១៣។
បើទោះជាការស្រាវជ្រាវមិនបានបង្ហាញចំនួនទឹកប្រាក់សរុប ដែលបេក្ខជនបានចំណាយក្នុងពេលប្រឡងក៏ដោយ តែបើគេយកចំនួនទឹកប្រាក់មធ្យមដែលសិស្សចំណាយម្នាក់ ៣៧ដុល្លារ គុណនឹងចំនួនបេក្ខជនសរុបនៅភ្នំពេញ សរុបជាង ១ម៉ឺន ៩ពាន់នាក់ (១៩.០៧៩) នោះគេនឹងឃើញថា សិស្សទាំងនោះបានចំណាយប្រមាណជាជាង ៧សែនដុល្លារអាមេរិកក្នុងពេលប្រឡង។ ហើយចំនួនទឹកប្រាក់ជាង ៧សែនដុល្លារ នេះ មិនបានរាប់បញ្ចូលប្រាក់ដែលសិស្សបានចំណាយសម្រាប់ចម្លង ឬទិញវិញ្ញាសាប្រឡងនៅខាងក្រៅឡើយ។
ការស្រាវជ្រាវរបស់អង្គការ វ៉ាយ.អ.ឌី.ភី បង្ហាញអោយឃើញថា អំពើពុករលួយដែលបានកើតឡើងក្នុងពេលប្រឡងភាគច្រើន ផ្ដួចផ្ដើមចេញពីសិស្សខ្លួនឯង ដែលនាំគ្នាប្រមូលលុយប្រគល់អោយគ្រូអនុរក្ស។
ការប្រឡងសញ្ញាបត្របាក់ឌុប ចាប់ផ្ដើមពីថ្ងៃច័ន្ទ ទី៥ និងបញ្ចប់នៅថ្ងៃពុធ ទី៧ ខែសីហា ឆ្នាំ២០១៣។ ក្រសួងអប់រំ បានឲ្យដឹងថា ការប្រឡងនេះមានបេក្ខជនជាង ១០ម៉ឺន ៥ពាន់នាក់ (១០៥.២៩៧) ក្រសួងអប់រំ បានប៉ាន់ស្មានថា បេក្ខជនដែលបានប្រឡងជាប់មានប្រមាណ ៨៧% នៃបេក្ខជនប្រឡងសរុប៕
No comments:
Post a Comment