សង្គមស៊ីវិល និងអ្នកវិភាគ៖ កំណែទម្រង់ស្ថាប័នកំពូលរបស់រដ្ឋមួយចំនួន គឺជាការចាំបាច់
VOD - 18 កញ្ញា 2013
សង្គមស៊ីវិល និងអ្នកវិភាគ ជំរុញឲ្យអ្នកនយោបាយអនុវត្តការសន្យារបស់ខ្លួន ធ្វើកំណែទម្រង់លើស្ថាប័នកំពូលរបស់រដ្ឋ និងស្ថាប័នជាតិមួយចំនួន ជាពិសេស គឺគណៈកម្មាធិការជាតិរៀបចំការបោះឆ្នោត(គ.ជ.ប) ដើម្បីឆ្លើយតបនឹងបញ្ហាប្រឈមរបស់ប្រជាពលរដ្ឋ ជាម្ចាស់ឆ្នោត។
ក្រោយពីជំនួបទល់មុខគ្នាលើកទី២ រយៈពេលជាង៣ម៉ោង រវាងថ្នាក់ដឹកនាំកំពូលគណបក្សប្រជាជនកម្ពុជា និងគណបក្សសង្គ្រោះជាតិ កាលពីថ្ងៃទី១៧ ខែកញ្ញា អ្នកនាំពាក្យភាគីទាំងពីរ មិនបានបង្ហាញលទ្ធផលជាក់លាក់ណាមួយនៃជំនួបនេះទេ ដោយគ្រាន់តែអះអាងថា មានការយោគយល់គ្នាច្រើន ហើយភាគីទាំងពីរ កំពុងពិចារណាឯកភាពគ្នា ដើម្បីធ្វើកំណែទម្រង់ស្ថាប័នជាតិមួយចំនួន ដោយឈរលើផលប្រយោជន៍ជាតិតែមួយ។
នាយកប្រតិបត្តិអង្គការឃ្លាំមើលការបោះឆ្នោត និកហ្វិច លោក ហង្ស ពុទ្ធា មានប្រសាសន៍ថា កិច្ចចរចា ដែលសម្រេចបាននូវកិច្ចព្រមព្រៀងធ្វើកំណែទម្រង់ស្ថាប័នជាតិនេះ គឺជាសញ្ញាវិជ្ជមានមួយ ដែលបង្ហាញពីភាពជឿនលឿននៃការយោគយល់គ្នារបស់ថ្នាក់ដឹកនាំគណបក្សនយោបាយ ។ ជាអនុសាសន៍ លោកជំរុញឲ្យមានកំណែទម្រង់ស្ថាប័នរដ្ឋមួយចំនួន ដូចជា គណៈកម្មាធិការជាតិរៀបចំការបោះឆ្នោត ប្រព័ន្ធតុលាការ និងក្រសួងព័ត៌មាន ដែលបានកំពុងរឹតបណ្តឹងសេរីភាពសារព័ត៌មាននៅកម្ពុជា ៖
នាយកប្រតិបត្តិអង្គការតម្លាភាពកម្ពុជា លោក ព្រាប កុល ក៏ទទូចឲ្យមានការធ្វើកំណែទម្រង់ ស្ថាប័នរដ្ឋជាច្រើន ក្នុងនោះ ប្រព័ន្ធតុលាការ គឺជាចំណុចគន្លឹះនៃកំណែទម្រង់ ដើម្បីឲ្យការអនុវត្តច្បាប់ មានប្រសិទ្ធិភាព អាចទប់ស្កាត់អំពើពុករលួយ និងអាចឈានទៅរកការរក្សាតម្លាភាព ក្នុងវិស័យដទៃទៀត។ លោក អះអាងថា សង្គមស៊ីវិល នឹងបន្តឃ្លាំមើលការសន្យារបស់គណបក្សនយោបាយ ក្នុងការធ្វើកំណែទម្រង់ សម្រាប់អាណត្តិទី៥ ៖
អ្នកវិភាគនយោបាយ លោក សុខ ទូច សង្កេតឃើញថា ស្ថាប័នជាតិ និងស្ថាប័នកំពូលរបស់រដ្ឋមួយចំនួន មិនទាន់មានឯករាជ្យពេញលេញនៅឡើយ ដូចជា រដ្ឋសភា ក្រុមប្រឹក្សាធម្មនុញ្ញ និង គ.ជ.ប។ ស្ថាប័ននីតិប្រតិបត្តិ និងប្រព័ន្ធតុលាការជាដើម គប្បីធ្វើកំណែទម្រង់ ដើម្បីឲ្យសេវាសាធារណៈទាំងនេះ មានតម្លាភាពត្រឹមត្រូវ និងអាចឆ្លើយតបទៅនឹងតម្រូវការផ្ទាល់របស់ពលរដ្ឋ ដែលជាម្ចាស់ឆ្នោត ៖
គេហទំព័ររបស់ស្ថានទូតអាមេរិកប្រចាំព្រះរាជាណាចក្រកម្ពុជា ដែលបានចុះផ្សាយពីយោបល់របស់ លោក William E. Todd ចេញផ្សាយ នៅថ្ងៃទី១៥ ខែកញ្ញា ឲ្យដឹងថា កំណែទម្រង់ថ្មីសំខាន់ៗ ដើម្បីដោះស្រាយបញ្ហានៅកម្ពុជា មានដូចជា អំពើពុករលួយ សេរីភាពនៃប្រព័ន្ធផ្សព្វផ្សាយ ឯករាជ្យភាពនៃតុលាការ និងឱកាសសេដ្ឋកិច្ច សម្រាប់ប្រជាជនកម្ពុជាទាំងអស់។ លោកបន្តថា តាមរយៈបទពិសោធន៍កន្លងមក ដំណើរការប្រជាធិបតេយ្យ មានភាពលំបាក និងមានភាពស្មុគស្មាញច្រើន នៅពេលខ្លះ តែការខិតខំរបស់ភាគីទាំងពីរ ដោយធ្វើការជាមួយម្ចាស់ឆ្នោតរបស់គេ អាចនាំដល់ការកែទម្រង់ ដែលនាំមកនូវការឯកភាពគ្នាច្រើន ហើយនាំឲ្យមានឱកាសថ្មីៗ សម្រាប់ដំណើរជឿនលឿនទៅមុខ។
ក្នុងកំណត់ត្រាសង្ខេបអនុសាសន៍របស់ខ្លួនស្តីពី កំណែទម្រង់សម្រាប់រាជរដ្ឋាភិបាលកម្ពុជាថ្មី ចេញផ្សាយខែកញ្ញា ឆ្នាំ២០១៣នេះ មជ្ឈមណ្ឌលសិទ្ធិមនុស្សកម្ពុជា បានផ្តល់ជាអនុសាសន៍កំណែទម្រង់លើវិស័យចំនួន ១០ មានដូចជា ការបង្កើតស្ថាប័នទទួលបន្ទុកសិទ្ធិមនុស្សជាតិ ការធានាឲ្យបាននូវសេរីភាពខាងបញ្ចេញមតិ និងការពារដល់បុគ្គលិកអង្គការមិនមែនរដ្ឋាភិបាល និងអ្នកការពារសិទិ្ធមនុស្ស គាំទ្រនូវការបង្កើតប្រព័ន្ធផ្សព្វផ្សាយព័ត៌មានជាតិឯករាជ្យមួយ ដោយលុបចោលច្បាប់ណាដែលមានលក្ខណៈរឹតបណ្តឹងទៅលើខ្លឹមសារ កំណែទម្រង់ គ.ជ.ប និងកំណែទម្រង់ផ្សេងៗទៀត៕
No comments:
Post a Comment